古天后日誌｜內外夾擊 港股難有運行

9月14日，天晴，日間天氣酷熱，非常乾燥，有煙霞，空氣污染數高企，我都鼻敏感發作。美股隔晚公布CPI數據後插水，之前美股升咗幾日，就係市場打賭通脹見頂，CPI將大幅下降，結果出嚟不似預期，唔單止CPI增長8.3%高過預期嘅8.1%，核心CPI亦高過預期。即係油價高位回落，其他物價、人工都上升，通脹仍然高企，市場開始有人估計，今次議息唔係要加息0.75%，係要加夠1%，而明年初掉頭減息嘅希望已幻滅，甚至有人開始估計明年初仲要繼續加息。美股升咗四日後，噚日一嘢跌突，道指跌近4%，一嘢插水1276點；標指跌4.3%；納指更跌逾5%，勁插632點。三大指數齊齊轉勢，美股仍未擺脫熊市，反彈到下降軌通道頂又再掉頭。

10年債息回升至3.42%，VIX亦見回升，科技股沽壓較大，不過今朝沽壓未有如5月咁大劑，主要係5月嗰次係息率急速上升，而今次息率已經企咗喺3%一段時間，加上科技股已經由高位調整咗唔少，今次無5月跌得咁勁都正常。美國經濟尚算強勁，即使步入加息周期，應該都捱得過，但同樣面對嚴重通脹嘅歐洲就大鑊得多。本來歐洲早十年前已被歐豬債務問題所困擾，過往十年一直靠QE保住啲歐洲企業。今次歐央行為對抗通脹，已鐵定心腸加息，呢鋪真係唔知歐洲捱唔捱得過。

中概股大幅回吐，京東（JD）大跌7%，騰訊ADR跌3%，美團ADR跌4.6%，睇怕今日港股又穿19000。不過港股日升日跌都唔係今時今日嘅事，成日裂口高開低開之後，全日就窄幅橫行，連炒即日波幅嘅機會都無乜。一池死水，而個別股份就會因為消息而急挫，好似藥明生物(02269)噚日就大跌20%，原因係美國總統拜登簽署行政命令幫助美國生物科技企業，估計又要打擊中國相關企業，中港生物科技股全線重創。除咗要應付內地朝令夕改嘅政策之外，面對美國對中企嘅打擊，港股真係難有運行。