陳嘉上誤洩王菲22年前秘密謝霆鋒偷陪女友到日本拍《戀戰沖繩》

2022-09-14 08:00

導演陳嘉上與劉浩良擔任ViuTV節目《導演．門》嘉賓，談及跟周星馳、張國榮及王菲等合作拍戲的點滴。講到當年向華強提議開拍《逃學威龍》，陳嘉上因不滿原來的劇本而拒拍，後來因為受到《監獄風雲》的啟發，覺得「警察入學校似坐監」的設定過癮，最後寫下15行主要橋段，在沒有完整劇本下開拍《逃學威龍》，全程靠演員即興演出：「每日快樂爆肚，唔知對方做乜，每日似玩，但求好笑開心」，更指當時身邊無人睇好：「當時啲場唔滿㗎！驚到我死！」

TEXT:星島頭條娛樂組

你睇咗幾多次《逃學威龍》?

陳嘉上又首爆男主角的第一人選並非星爺，但在他堅持下，向華強最後二話不說簽下星爺私有化，而星爺的入血演出亦沒有令大家失望。陳嘉上亦提到向生很懂得電影，當年他看過試片後，表示只對星爺出貓的一場戲不滿意，所以陳嘉上後來加了黃炳耀找來一班警察幫手，造就「膊頭有花全部同我入嚟」經典一幕。

超記得呢幕。

至於開鏡後改動最大的電影，就是當年橫掃金像獎5項大獎，由黃秋生、王敏德及李璨琛主演的《野獸刑警》，陳嘉上指最初構想是拍一部大喜劇：「嗰時正值盜版最猖狂嘅時期，成個電影業嘅氣氛都唔好，拍咗1日就叫停。」

1998年上映。

節目中，陳導演講得最多就係張國榮，他於1984年上映的電影《緣份》中擔任編劇，「點解張國榮會演《緣份》?同我有關，《緣份》男主角本來唔係張國榮，原定嗰位都係好好嘅演員，但幕後人唔係咁鍾意，我哋好想睇張國榮，我哋覺得張國榮好努力，好厲害，好肯搏，導演黃泰來問點呀，我哋試試先，我同葉錦鴻(電影導演，曾憑《半支煙》提名香港電影金像獎最佳編劇)、余耀良(《緣份》副導演)，喺邵氏製片室推住白板，喺上面寫低原定男主角及張國榮個名，叫大家投票，之後衝去當時電影監製方逸華辦公室，『我哋投咗票，大部分人支持張國榮』，方姐話已經決定咗，我哋話，你未同佢講吖嘛，方姐最後望住一班後生仔，點一點頭，張國榮因為咁而有得演呢部戲。」

1984年上映的《緣份》。

講返當年大家投票選張國榮做《緣份》男主角。

問到兩人的關係，陳嘉上透露張國榮視佢如哥哥，「我叫張國榮拍《錦繡前程》，打比佢，『LESLIE，我幫中國星拍戲』，佢剩係問，幾時?邊個?我話我想搵家輝，關之琳，佢答我好呀，得，就傾完，」之後拍《戀戰沖繩》更癲，連劇本都冇。「同張國榮講大約想咁樣，佢話好，問邊個做女主角?我話我未諗到，佢話阿菲啦，我話我唔識阿菲，佢話:『我識吖嘛』，然後佢就搵咗阿菲做女主角。」

1994年上映的《錦繡前程》。

對於第一次跟王菲合作，陳嘉上非常滿意，「阿菲係我好佩服嘅演員，我好唔服氣好多人話佢本色演出，你試你嚟做，本色演出?你試吓演自己，你太唔理解一個演員對住鏡頭時，好難做到自己，王菲目中無鏡頭，佢只係問咗一句，『呢個人係點樣㗎，你知我唔識做戲，我唔熟悉嗰個人我做唔到』，我就同佢介紹角色，佢話好得意喎，我諗我得，然後就講完嘞。」

當年在日本舉行記者會。

陳嘉上又提到點解咁鍾意《戀戰》，「真係少數，我連劇本都唔肯俾演員，只俾幾句重要對白，話俾佢哋聽今日發生咩事，你哋撞埋一齊啦，好多戲份都係即興，我好緊張，但要製造一個非常輕鬆嘅環境，張國榮，梁家輝，王菲，黎姿，後面仲有一個謝霆鋒，呢群人喺堤壩上，玩『一二三，紅綠燈』，就係咁嘅狀態，我好緊張電影，萬一拍唔好點算，而且部戲對我當年好大打擊，因為票房唔好，但我一啲都無後悔，幸好我拍咗《戀戰沖繩》。」

導演無悔拍《戀戰沖繩》。

美好的回憶。

記者睇過《戀戰》超過三十次，從來冇見過謝霆鋒出現在戲中，再翻查資料，電影於2000年上映，當年王菲同霆鋒傳緋聞傳得好勁，更曾被拍攝到在酒吧熱吻，而王菲又於《花樣年華》慶功宴後在成堆傳媒面前拖住霆鋒大搖大擺離開。相信當年霆鋒為陪王菲拍戲飛到沖繩，陳導演記憶中的「後面仲有一個謝霆鋒」，應該不是戲內而是戲外情景。因為一次訪問，陳導演誤洩王菲22年前秘密，反正王菲同霆鋒於14年復合至今8年依然恩愛，唔緊要啦。