古天后日誌｜指數龍頭排住隊被減持

9月9日，天晴，天氣乾燥，日間天氣酷熱。隔晚美股低開後尾市有後反彈，雖然歐央行宣布加息0.75%，拖累歐洲股市下跌，美股早段低開，不過上月美股經過一輪挾淡倉後，淡倉已減少，令9月跌勢不及5月強勁，超賣後出現反彈亦好正常。業績期結束後，美股暫時無乜方向，市場等待CPI公布，仲有FOMC議息，以及下周四重期結算嘅四巫日，預期喺議息前，美股表現繼續反覆。

喺燃氣價格高企下，歐洲今年CPI預測由6.8%調高至8.1%，明年預測則由3.5%調高至5.5%，為抑止通脹，歐央行決定加息0.75%，並預期未來息口將進一步上升，市場認為歐央行下月再加息0.75%嘅機率已增至四成。不過歐央行繼續保留緊急抗疫購債計劃(PEPP)嘅QE方案至2024年底，當然係為咗一旦經濟衰退，以及債息急升時作為應對之用。

鮑爺已暗示為對抗通脹將繼續大大力加息，但市場反應唔算大，納指連跌七日後有資金低位吸納，加上今次美股跌浪期間，未見VIX有升過30水平，跌市期間多都係由19升至27，市場嘅恐慌程度，遠遠不及5月份。美匯指數升至110左右已無力再推上，市場再次risk on，亞洲貨幣嘅跌勢有所緩和，睇睇今日個市有冇得借勢彈一彈。

不過港股就算反彈，力度都唔會好大，可能19200至19300左右又行人止步，幾隻龍頭股都有大股東準備沽貨，個個都想套現自救，Naspers需要大量現金進行回購以支持自身股價，又將大大嚿貨轉倉去CCASS等沽貨套現，騰訊(00700)就有消息指有意減持手上投資套現千億，美團(03690)跟快手(01024)等又成為沽貨目標，仲有日本仔要沽阿里(09988)，幾隻恒指重磅股都要排住隊畀人沽，港股呢期都只會係有波幅，冇升幅，可能就係19000水平，上下幾百點上落。