古天后日誌｜港股對好消息無動於衷

9月6日，大致天晴，日間天氣酷熱，天氣相當乾燥。隔晚美股休市，但美匯指數繼續向上，升破110大關，歐元英鎊弱勢持續，歐洲受能源危機所困擾，俄羅斯為報復西方國家制裁，宣布無限期關掉天然氣管道北溪一號，歐洲天然氣價急升逾三成，最終升幅收窄至一成收市，而油價跟隨反彈4%。

美匯指數強勁，人民幣受壓，離岸價直迫7算水平，為遏止人民幣下跌壓力，內地宣布下調外匯存款準備金2%，為市場增加美元流動性。不過美國繼續收水，資金回流美元區係無可避免，歐洲亦難防資金流走。雖然阿爺減RRR，但隔晚夜期唔見得有幾興奮，市場對於呢啲所謂好消息似乎無乜反應。

就好似比亞迪8月新能源車銷售達17.49萬輛，增長1.84倍，但喺股神持續減持下，繼續捱沽，股價噚日再跌6%，車股都一樣齊齊受靶。即使新能源汽車銷售理想，汽車股全線受壓。

另一個唔理好消息股價都係跌嘅板塊係光伏股，喺中國嚴重缺電下，阿爺加快綠色能源併網，國家能源局最新要求所有光伏電站項目，必需喺併網後六個月內，取得電力業務許可證。雖然光伏需求上升，但光伏股不升反跌，完全唔知佢呢啲係乜嘢玩法。

至於大市整體可以用一個削字總結，好友喺8月份期指結算前，借中美就中概股審計達成協議去挾淡友，恒指一度高見20185，可惜未有成交配合，無人願意入場追貨，期結過後，升勢奴曇花一現，結算後又打回原形，噚日更下試19000心理關口支持，跌穿5月10日低位，創四個月新低19064。唯有慶幸係低位成交縮減，市場追沽力度唔大，只可惜無買盤下，反彈乏力，小心港股步入陰乾式下跌，慢慢向住3月低位推進。