深水埗男童命案｜救人衝鋒隊員：放手就會一齊跌落去 好驚險

深水埗唐樓劏房今凌晨發生孕婦企跳揭發其5歳幼兒猝死慘劇，婦人企跳期間，雙腳凌空半天吊在簷篷上，險象環生，幸得當時接報到場的消防員拼命捉着婦人雙手，其後接報加入的警方西九龍衝鋒隊員阿聰，與消防員合力，終救起企跳婦送院，阿聰形容過程驚險，「如果唔係後面有人（消防）幫我，我分分鐘同個女仔一齊跌落去！」

西九龍衝鋒隊員阿聰講述救人過程。

阿聰當差13年，現任西九龍衝鋒隊第三隊，今日凌晨接報到場，已見女事主站在簷篷外，「成個人離開咗簷篷位，消防好快捉住佢，我哋到咗樓上，間劏房鎖住咗，要十幾秒先break in ，聽到消防大聲叫個女人唔好（放手），消防捉住佢，我哋見到床上有個小朋友，我第一個衝入去探半身望見個女人，佢當時好衝動，似想輕生。」

阿聰續說：「消防員好辛苦，我同佢一人一邊，好似燒鵝髀咁捉住個女人，佢兩隻腳垂低晒，離開晒簷篷，消防同我捉住佢，放手就會跌落去，最慘地方所限，其他人幫唔到手，大家又有手汗，個女人又有小小掙扎，情況驚險。可幸有雲梯，有其他消防頂住我哋，最後消防升雲梯上嚟，救咗個女人，過程約10分鐘。」

企跳婦獲救送院。

「我以前見過企跳，但只係support同事，做箭頭係第一次，我想話畀市民知，見到有呢啲事，若第一時間阻止到最好，否則都要確保自己的安全，如果唔係後面有人幫我，我分分鐘同個女仔一齊跌落去，大家要量力而為。」

 立即下載｜全新《星島頭條》APP：https://bit.ly/3yLrgYZ