獨家丨炎明熹備戰DSE自嘲貼考題永遠貼唔中讚楊千嬅主動提點有媽咪Feel

2022-08-23 07:00

炎明熹（Gigi）終由內地回歸香港兼推出新歌《焰》，自爆參與《聲生不息》後獲益良多，全程又獲楊千嬅特別照顧，被叫「阿女」超幸福。雖然Gigi 在內地工作有機會多見家人，但明年要考DSE，故未來一年會專注學業放輕工作。採訪：杜杜攝影：朱偉彥髮型：Hugo Poon @iiAlchemy 化妝：King Yip @Kings Makeup 場地：The AIR (The ONE)

冇見Gigi一段日子，不單思想成熟了，身高都有增長。

新歌《焰》講團結力量更大，Gigi認為就好似工作一樣，「得我一個人好難做好任何嘢。」製作歌曲過程更令她明白一個道理，「我諗到個火要柔，好似自信咁，唔可以太多，過咗籠就唔係幾好，要不慍不火。」Gigi因在內地而首次用遙距方式錄新歌，對於新歌歌聲有不同，她就解釋因只得17歲，聲音仍在變未穩定，她亦會不斷嘗試搵出最好聽的聲音，「我唔係專注用一個tone去唱，唔同歌會用唔tone去表達，認唔出反而係好事，呢個階段想不斷試，暫時仲揣摩緊。」

Gigi新歌《焰》講團結力量更大，令她得到啟發。

首見前輩內心好滾動

講到在《聲》中跟多位前輩合作，Gigi坦承非常之滾動，不過她跟一班前輩好快熟絡，仲夠膽向他們請教，「佢哋唔難相處，都好nice，我會問佢哋問題，佢哋都會好願意解答，一開頭見覺得係遙不可及，遠在天邊咁，𠵱家可以近在眼前好榮幸。」

Gigi面對一班前輩工作，由最初緊張到後來打成一片。

當中Gigi跟楊千嬅和葉蒨文最熟絡，特別是參賽時跟她合唱過《勇》的前者，對她更加愛護有加，「相處得比較多，千嬅姐嘅低音真係處理得好好，我就問佢個低音點算呀？《念親恩》有個位置係好低，佢就毫無障礙咁表演咗出嚟，跟住講咗一大輪教我，我又再問佢其他問題，不過有時我未問佢，佢已經會主動話『阿女，你有冇咩地方需要我幫忙？你最近點呀？』，佢會好親切，真係好關心我。」對於獲千嬅稱呼「阿女」，Gigi覺得勁冧，仲覺得對方有啲媽咪feel，「畀人照顧嘅感覺，好幸福！」

Gigi跟千嬅合唱《勇》，初次合作已表現合拍。

原來私底下，Gigi更獲「千嬅媽媽」家長式照顧。

內地粉絲講土味情話

Gigi在《聲》中學習得最多是溝通技巧，最開心就是趁機跟家人見面，「好開心，見過三次，有次去深圳表演，爹哋媽咪帶埋細佬妹嚟，所以一次過見晒，都會掛住佢哋，但已經見過唔可以太貪心。」Gigi強調香港及內地粉絲同樣重要，所以不會為多見家人而多到內地工作，更笑言發現內地粉絲表達支持方式跟香港粉絲大不同，「佢哋會講土味情話，聽完之後會起雞皮嗰種，例如有次我表演跳舞，佢就會話『你跳舞可唔可以跟拍子，點解你次次都踩住我個心去跳』嘩！哈哈！」她又感動有粉絲專登到長沙支持，「有啲真係坐高鐵或者坐飛機專登嚟睇我表演，會好感動。」

Gigi到內地工作最大好處，就是可以趁機跟家人團聚。

Gigi返鄉探望家人，搞到嫲嫲和媽咪都感動到喊。

本身在內地已有知名度的Gigi，參加完《聲生不息》更加爆紅。

雖然在內地發展順利，Gigi強調不會放棄香港粉絲。

參加《聲》期間，Gigi要用遙距方式上堂，她坦承對學習有一定影響，由於明年將考DSE，未來一年學習好關鍵，所以會專注學業放輕工作。上台表演好淡定的她，自爆每次考英文口試都會緊張過唱歌，「我個心仲跳得快過上台，係我第一次上台嘅感覺，每次口試我都係跳到咁。」講到有冇信心考到好成績，她搞笑話：「最有信心係設計，最冇信心就全部都係，因為設計、畫畫係畫自己想像嘅服裝係點，其他科就冇把握，因為溫嘅嘢都冇出到，差唔多次次都貼唔中，唯有盡量溫晒佢。」