獨家丨趙頌茹拒提周永恆有冇畀贍養費 做靚份CV重新出發

入行20年嘅趙頌茹（阿Yu）相隔18年再推出新歌《大致天晴間中有雨》，唱出人生無常，總有陰晴不定，但下雨天總會過去，喻意要擁抱舊時，展望將來。其中有句歌詞係：「輕輕呼氣頃刻釋懷 我已沒有恨」，曾被出軌前夫周永恆家暴嘅阿Yu，坦言已原諒咗對方，唔想將寶貴嘅時間放喺唔開心嘅事情上。採訪：方騫平 場地：觀塘興業街The Stadium

趙頌茹希望有40歲嘅智慧，且每年要有進步。

剛踏入40歲嘅單親媽媽趙頌茹趁住出道20年推出新歌，除咗帶出鼓勵訊息，坦承要做返好個CV(履歷表)，唔想大家只記得佢曾被家暴及已離婚。

阿Yu相隔18年再推出新歌《大致天晴間中有雨》。

阿Yu最想做稱職單親媽媽。

與兩女生活開心
不過，阿Yu否認為咗「洗底」：「發生咗嘅嘢抹唔走，每個人嘅人生總有唔同嘅嘢發生，有開心，有唔開心，我亦冇得怪人劃花咗我個CV，因為好多時自己都有份參與，唯有展望將來，變得愈嚟愈好。」阿Yu拒提已經再婚嘅前夫，有否畀贍養費3母女，她避忌說：「講咗咁多年唔再講喇！我有我嘅生活，我同大女信希及細女愛希生活得好開心，兩個女都清楚知道發生乜事，所以最好唔好再提起佢啦。」

阿Yu跟前夫周永恆有段甜蜜過去，最後被背叛，反面收場。

阿Yu同兩女相依為命。

2018年周永恆離婚後不久，即同陳薇奉子成婚。

阿Yu亦強調佢係開心嘅，唔係強顏歡笑：「《金宵大廈2》集慘事於一身，所以有機會我都想拍啲開心嘅角色。」阿Yu透露目前喺凍肉公司做文職養女，工餘時間用嚟湊女及兼顧幕前，為兩女搵返啲補習費，生活充實冇諗過拍拖：「都有朋友做過紅娘，但溝通唔到，可能年紀大咗唔只要求外表。」

去年11月趙頌茹為《Reinvention 馬天佑 衫。重奏》演出。

阿Yu唔想再拍啲悲慘角色，唔想惹嚟誤解。

立即下載 | 全新《星島頭條》APP : https://bit.ly/3yLrgYZ