獨家丨張繼聰拒邀老婆上台:佢都冇請過我做嘉賓啦平反「廢柴老公」自資70萬出歌開騷

2022-08-16 07:00

等咗7年，42歲嘅張繼聰宣佈將於10月15日，在麥花臣場館開《Welcome to Route 37》演唱會，仲會陸續自資出新歌配合「回歸」音樂之旅！阿聰形容自己係中年人，夾喺MIRROR及張敬軒中間。回想當年被雜誌大字標題寫係「廢柴老公」，阿聰坦言心靈受創，幸得長輩開解，令他置諸死地而後生，因此也特別關顧年青一輩，尤其MIRROR：「今次嘅嘢冇人經歷過，想像唔到佢哋嘅傷害有幾大！」採訪：方騫平攝影：羅安強

因為經歷過高低潮，張繼聰目前會做自己想做嘅嘢，總之對得住自己就得。

兩公婆多年嚟都sweet到爆。

阿聰7年前曾經喺九展舉行處男演唱會。

張繼聰再戰樂壇有段故，原來他本打算專心做演員，一早已收埋所有結他，直至兩年前爆發疫情，因為留家抗疫好無聊，加上當時正值40歲，令他突然叮一聲有唔同嘅睇法，「我哋呢個年齡層嘅經歷，年輕人未必會明白，但又冇乜歌表達到中年人嘅情感，所以我自資做歌，單係製作7首新歌連MV，就算慳住使最平夾埋要70萬，既然能力負擔到，當係送畀自己及知音人嘅禮物，最多唔買電單車。」

張繼聰再唔介意啲人點睇佢，因為欣賞你嘅人就會支持你。

阿聰曾收埋家中結他唔再唱歌，希望專心演戲。

張繼聰寧願唔買電單車都投資來唱歌。

阿聰視拍戲為本業，然後努力賺錢做歌。

出歌冇諗過攞獎

由於本業係演戲，唱歌對阿聰來說冇壓力，更加冇諗過要攞獎，講到明用嚟自High：「中年人都鍾意聽歌，做Show又好好玩。」他又直言老婆謝安琪(阿Kay)都好支持他玩音樂：「老公都唔支持，佢支持邊個呀？每個人都有興趣，所以你哋要買飛入場嚟支持我呀！」不過，阿聰強調唔會同阿Kay喺演唱會上合體：「我哋都抗拒，冇乜好睇啫，佢開咗咁多次演唱會都冇請過我做嘉賓啦！其實我成十年冇開show，我先至係自己演唱會嘅嘉賓，反而想佢喺後台打點，同埋喺台下專心欣賞，返到屋企畀個『賽後報告』我。」

謝安琪好支持老公。

張繼聰和謝安琪育有15歲大仔張瞻及5歲孻女張靖。

阿聰推出了新歌《一個人的武林》。

張繼聰帶笑投訴老婆，開咗咁多次演唱會都冇請過他做嘉賓啦！

置諸死地而後生

07年，張繼聰跟謝安琪奉子成婚備受批評，之後又被雜誌以「廢柴老公」作稱呼並用作封面。「人生要經歷呢啲，唔死先會去到另一個階段，唔肯認係廢，只好畀心機做好啲。不過嗰段日子成個家庭都受傷害，邊個父母想個仔咁畀人話？但冇嗰段經歷，唔會有之後嘅感受，之後做演員會易啲明白，更加學會Care人哋感受，唔會亂開玩笑令人受傷。」問到今時今日，係咪可以好自豪地平反「廢柴老公」之名？他答得淡然：「𠵱家點講都冇所謂啦！鍾意嘅人就會鍾意你，我睇返自己20幾歲結婚生仔算好勁，默默耕耘寫歌，雖然係窮啲，但養得起老婆有乜問題？」因此，阿聰特別疼錫年青人：「佢哋可以隨時搵我傾偈，就算工作，心理都要快樂。」