獨家丨余慕蓮出自傳:最好瞓瞓吓走冇痛苦大病後咳到哮喘已安排捐身家

2022-08-12 06:58

前年11月，85歲余慕蓮（余毛）患上罕有嘅血液炎傷害到個肺，導致肺纖維化一度危殆入住ICU，雖然執返條命仔，但身體跌晒Watt，日日咳到甩肺。《頭條娛樂》記者目擊余毛姐喘晒氣狂咳3分鐘，甚至咳到眼淚鼻涕齊流，真係好陰公。她面紅紅兼喘晒氣說：「最好瞓瞓吓死咗，冇痛苦。」𠵱家余毛姐做人宗旨係過一日賺一日，活在當下！採訪：方騫平

余毛性格樂觀，已安排好自己身後事。

真係咳得好辛苦。

余毛接受訪問前勁咳3分鐘，咳到標晒眼水及鼻涕，面都紅埋。

余慕蓮推出自傳《我是一條豆角》，不扣除成本，收益全數撥捐兒童癌病基金，余毛善心得到一呼百應，初版2000本全被內部認購，再版2000本都幾乎被朋友掃清，要印第3版才能推出市面公開發售。

余慕蓮最近推出自傳《我是一條豆角》，反應熱烈。

最自豪做Model行天橋

早於2008年余毛拍第3輯《向世界出發》時經已有人打她主意出自傳，但她不為所動，直至近期因為執屋，掉走一啲舊相，朋友見到提議她出自傳：「𠵱家唔掉(舊相)，第日死咗人地咪一樣係掉，咁朋友話出咪出囉，反正係做善事，我後生都幾靚㗎！」

2008年余毛拍第3輯《向世界出發》時經已有人打她主意出自傳。

余慕蓮陳年泳照喺自傳中曝光。

小時候嘅余慕蓮面尖尖，雙眼好精靈。

少女時靚相。

係索女嚟喎。

余毛因父母離婚，所以她唔打算結婚，早於40多年前影婚紗照留念。

自傳中滿載朋友溫情，除米雪、林建明等關愛外；仲有提及陪李香琴出埠登台，汪明荃忽發奇想建議她一齊上台玩，還提供埋啱身嘅二手戰衣，兼有專人化妝，讓余毛姐可以靚靚登場：「我好鍾意登台，舊公司成日醜化我，我唔鍾意，做到無晒癮，70歲就退休。」自傳中當然唔少得講到「大恩人」鄧達智大膽用她做Model，喺大會堂行Catwalk，余毛姐諗返起都好自豪：「我又唔怕嘅，當自己做緊《EYT》，喺台上開心揮手，結果贏得好多掌聲。」

沙姐、羅蘭及戚美珍多年嚟都好照顧余毛。

鄧達智邀請余毛做時裝show壓軸嘉賓。

15年前余毛為鄧達智嘅《九龍皇帝十年回顧》做時裝Show模特兒。

大姐明經常探訪。

張衛健匯八萬標靶藥費

重提當日昏迷送院，病情危重，住院半年幸能大步檻過。余毛毫不忌諱說：「醫生形容我同魯芬病情一樣係九死一生，𠵱家定期用標靶藥嚟控制住病情…」天生樂觀嘅余毛姐自爆經已安排好身後事：「我寫晒平安紙，會捐出𠵱家住緊，一廳兩房嘅旺角舊樓(30年前用幾十萬買落，市值大概600萬)，仲會撒灰喺紀念花園。

余毛留院半年，去年4月終於出院。

醫生形容她同魯芬病情一樣係九死一生。

余毛姐堅持唔驚死：「日日都死咁多人驚乜？琴姐、炳哥、我隔籬屋鄰居…最重要好死，唔好有事又車返去醫院，住院嗰半年唔生唔死，食唔到講唔到嘢，如果要瞓牀，多10年命都死得喇！𠵱家做一日賺一日，有牌打有戲睇就去。」余毛姐又話活到今時今日人生冇遺憾，唯一喺4年前畀「朋友」所害，以為上廣州身體檢查，原來被騙去打「回春針」拍廣告，唔排除係因為咁演變成大病：「唔係被害我可以平平安安咁，玩多幾年安享晚年，𠵱家唔知玩得幾多個月，不過都賺咗好多友情，朋友個個都對我好好，張衛健擔心我冇能力負擔昂貴嘅標靶藥費，身在北京匯錢畀我，我問銀行職員係咪8000(蚊)？佢話我睇少咗個零呀，我哋唔係合作好多，但真心好感動。」