鄧兆尊見識ViuTV內部溝通混亂出糧拖數又遭某台無理要求派利是擺幾圍

2022-08-05 23:00

曾志豪及貴花田擔任主持的網上頻道「田祖豪3寶」，昨日（4日）找來鄧兆尊亮相，三人大談電視台的秘聞，不少網民向兆尊提出「娛樂圈Q&A」問題，他除自爆當日入TVB傾約的價錢外，更大爆在其他電視台見過的「無語事件」，當中提到ViuTV溝通混亂，內部管理不及TVB好。

鄧兆尊上曾志豪及貴花田擔任主持嘅網上頻道，大談娛圈秘聞。

TVB出身的兆尊，近年回復自由身後，穿梭ViuTV、香港開電視等台的節目做嘉賓。曾志豪就提到電視台賺到盡問題，兆尊先講返TVB拍攝情況：「大台始終幾唔好都好，內部管理好好，我之前返TVB拍修哥（胡楓）大壽個節目，5、6部攝影機一齊拍，啲嘢好快。」不過到他去另一個台開工，就有所比較：「另一個台我去拍嘢，導演同收音師講，『個咪唔係好得，換過佢』，點知個收音師話『咁我入倉攞』，個導演就話咁唔使喇。仲有佢哋約你幾點，例如約我6點去到，點知一去到就話大家放飯，我坐咗兩個鐘頭等佢放飯，冇所謂，但佢內部溝通好有問題，管理層要做吓嘢。」貴花田聞言大感驚訝。

兆尊續說：「呢個算小事，以我過往經驗，做完嘢就會畀單你簽就出糧，我去某一個台，我唔講邊間喇，佢問我拎invoice，佢話要再遞上會計部，30至60日就會畀錢我，我從未見過。我去拍係因為幫朋友，啲錢少到出一出街都用完，只係希望佢做好啲，唔好令人覺得委屈。」他表示最後拖足40日才出糧。

鄧兆尊（左）參與不少ViuTV節目。

鄧兆尊（右二）早前為ViuTV節目《拆你個夢》擔任嘉賓。

之後兆尊再分享一宗令人驚訝的事件：「我講一個好好笑嘅真實故事，過年有一個台搵我，我哋想搵你新年帶歡樂畀大家，叫我突擊去幾間食肆派利是畀啲食客，我OK唔係問題，『不過利是係你（我）出』，仲要係請埋嗰啲人食飯，當開工飯喎，三圍到啦！」兆尊最終回覆話想嗌埋記者採訪，他說：「冇問題嘅，我叫埋記者嚟，你唔介意呀嘛？你個台做啲嘢咁先進，應該畀其他台仿傚吓。」拍攝最後不了了之。曾志豪笑問「無言感激」利是對比起已算不錯，兆尊也有同感。