阿正獲提名百大美女感尷尬覺得自己拉低咗條Curve

2022-06-22 09:00

商台DJ阿正（黃正宜）近年拍ViuTV綜藝節目成功入屋，不介意被當諧星兼行痴女路線，加上轉數快，深得網民喜愛，亦儲落唔少Fans。近日被網民嘲因新增課金制而玩爛咗的「全球百大俊男美女2022」，原來仲有更新提名名單，日前主辦活動的TC Candler繼續於IG公佈獲提名的明星，當中包括來自香港的阿正，以及2014年落選港姐楊埕。

阿正（右三）拍ViuTV《膠戰》入屋。

阿正在節目中的痴女形象，網民好受落。

原來「全球百大俊男美女2022」提名名單仲未更新完，阿正都有份入圍呀！

仲有2014年落選港姐楊埕。

阿正的Fans見偶像被歸類為「美女」，當然開心啦！更到提名Po度留言恭喜阿正。不過阿正則於IG限時動態表示有啲尷尬，「但都講句多謝。我覺得自己拉低咗條Curve。」其實她非第一個入圍後感到尷尬的公眾人物，之前填詞人黃偉文入圍百大俊男時，都表示希望TC Candler撤回讓他入圍的決定。而近日亦都有網民發現，個名單愈來愈多IG得幾百人Follow的不知名香港KOL入圍，覺得個名單好匪夷所思。