葉巧琳與Serrini歌聲神奇地夾邀「王子」Freddy陪唱圓公主夢

2022-06-12 01:30

葉巧琳（Mischa）最近將其網上頻道化身成音樂劇舞台，邀請Serrini和著名音樂家 Freddy Au Yeung （歐陽豐彥）分別合作。Mischa形容 Serrini是她的「另一半」，因為她們在去年公演的音樂劇《攣攣成人禮》中，飾演一對女同志戀人，Mischa謂：「我覺得我同佢把聲係神奇地夾，套劇演出後，聽到好多feedback 都係好嘅，我覺得同佢之間嘅化學反應幾奇妙，所以今次搵佢，好開心亦好好彩佢好快就答應。」

Mischa 特地選唱首套將同性戀搬上百老滙舞台的搖滾音樂劇《吉屋出租》（Rent）的《Take Me or Leave Me》來翻唱，她解釋：「因為我想有首女女合唱歌，首歌本身已經係好似一對情侶喺度嗌緊交咁，我覺得今次好似延續返我哋《攣攣成人禮》嗰段關係，希望大家都會喜歡呢首歌。因為我哋平日唱好多廣東歌，今次試吓唱英文嘅音樂劇嘅cover，想大家聽下有咩感覺，喺睇我哋嘅另一面之餘，又可以睇埋我哋會產生啲咩火花。」

葉巧琳喺自己嘅YouTube Channel 推出音樂劇系列。

葉巧琳同Serrini曾經喺音樂劇《攣攣成人禮》中，飾演一對女同志戀人。

這邊廂延續攣情，那邊廂的Mischa 又趕着追另一夢… 很多女孩都會發的公主夢，近日她終於以自己最愛的音樂，如願「做公主」！Mischa邀得「把聲係非常之王子」的Freddy 合作，合唱迪士尼動畫《長髮公主》（Tangled）的《I see the light》，Mischa 坦言希望添食：「多謝 Freddy 陪我玩，佢係一個非常之好玩嘅一個人，我同佢都幾好傾，希望之後再有music cover 的話，可以再同佢合作！」