獨家丨林希靈陳安立拍住上搵錢年底結婚幫練美娟羅天宇做媒

2022-05-30 07:00

去年尾，前《東張西望》「正義女神」林希靈(Agnes)離開工作咗7年嘅TVB，目前簽咗經理人以自由身嚟接Job。Agnes將於年尾下嫁ViuTV型男陳安立（Brian），廣告商急不及待搵兩人拍住上，Brian仲話兩人都想生B，放聲氣話可以接埋小朋友job，Agnes就想一齊拍旅遊節目，總之兩人合體，商機無限。採訪：方騫平攝影：沈健程場地：THE STADIUM@觀塘

兩人年底搞「佛系」婚宴。

Brian承諾會努力畀Agnes有更好嘅生活。

Agnes將於年尾下嫁ViuTV型男陳安立（Brian）。

33歲林希靈因主持《東張西望》的「聾啞女」事件獲封為「正義女神」，網民見佢出心出力係咁畀Like。不過，Agnes都決定外闖，試吓不同工作：「其實好感恩做《東張》可以訓練到膽色，除咗「聾啞女美華」事件，之前採訪老鼠、曱甴屋，甚至試過被精神有異嘅人拉出門口，坦白我真係搞唔掂，緊張到出晒手汗，成個咪都濕晒，好難忘，仲有次做臥底扮乘客登船被揭發，滯留島上冇船家肯我哋接走。」Brian坦言欣賞Agnes夠膽硬著頭皮挑戰自己，但都會擔心她安危。𠵱家Agnes接咗港台及開電視節目，都想同未婚夫一齊做吓主持，寓工作於拍拖，拍劇都有興趣。

因主持《東張西望》「聾啞女」事件，Agnes獲封「正義女神」。

讚好羅天宇人品

另外，提到籌備中嘅午間婚宴，Agnes形容會好「佛系」，因為接近聖誕節，笑言會加入火雞等應節食材，一對新人要求由頭食到尾，所有親友輕輕鬆鬆Enjoy Party，Brian自爆會幫單身朋友招募另一半，Agnes笑說：「到時會精心安排座位，如娟姐(練美娟)會同11位男士坐；羅天宇就坐去11個女仔嗰枱。」Brian大讚天字既老實又善良，希望佢搵到女神。