獨家丨黑妹姐搵肥媽搞網上音樂會互爆情史三年冇收入快「乾塘」

2022-05-18 23:30

黑妹（李麗霞）和Maria Cordero（肥媽）將於明晚(19日) 舉行付費的《媽妹笑住唱網上音樂會》，此Online Show由黑妹姐即興發起：「𠵱家個個都處於低潮唔開心，所以搵啲嘢出嚟畀大家開心吓。」黑妹姐自爆疫情呢3年都零收入，形容食老本食到快「乾塘」，但點都好，患過重病的她，體會到要好好活在當下。採訪：方騫平

61歲的黑妹姐學會享受人生。

黑妹姐及肥媽拍片教長輩觀眾如何網上付費。

黑妹姐大讚今次網上音樂會好抵睇，除咗場地唔同，但其他模式同一般演唱會冇乜大分別，rundown有歌舞及棟篤笑外，兩人亦會換晚裝演出，仲請咗羅敏莊及Joe Junior任表演嘉賓，因為屬線上音樂會，全世界都睇到，就算海外歌迷都可以安坐家中睇show。對於肥媽話會爆佢情史，黑妹姐大笑說：「我唔怕啦，佢爆我，我咪爆返佢囉！」問到係咪肥媽𠵱家有人追？黑妹姐鬼馬地笑住賣關子：「唔話畀你聽，等你心思思。」

《媽妹笑住唱網上音樂會》票價198元。

網上音樂會請來羅敏莊及Joe Junior任嘉賓。

兩年前肥媽及黑妹姐做過網上Show，為疫情下的港人打氣。

健康不錯已做返運動

原先肥媽3月喺紅館舉行《肥媽面對面演唱會》，因疫情延期到明年1月，直至兩星期前黑妹姐冇嘢做想搵啲嘢嚟做，忽發奇想提出搞直播show：「我足足有3年收入係零，有支出冇收入喎！哈！好快會見底，不過我又冇乜擔心過，等疫情好返咪再戰江湖囉，冇乜所謂啦，最重要係身體健康。」黑妹曾因頸椎、肺癌及腦部腫瘤而先後進行咗3次大手術，她明白到做人最緊要開心，亦想向歡眾發放歡笑。問到健康狀況時，黑妹姐透露已做返運動，目前健康正進步中，她為自己打氣說：「我會加油！」