鄭世豪累積經驗教唱歌疫情靠《愛回家》收入繼續追音樂夢

2022-05-01 14:45

鄭世豪日前作客TVB娛樂新聞台節目《StarTalk》，接受主播許文軒（Edmond）專訪，大談近年成為唱歌老師教授學生感受，世豪說：「一直有好多人叫我去教唱歌，但初初唔敢去誤人子弟，經過自己入行唱歌，多咗好多經驗，自己亦都上咗一啲教唱歌嘅音樂課程，所以在疫情下的起心肝決定開始教。而且為咗教堂自己更加學埋鋼琴，咁上堂時可以同學生即時練習，依家間唔中一有時間我仲會拍片自彈自唱上載上網。」

鄭世豪一直唔敢教人唱歌，怕誤人子弟。

接受主播許文軒訪問。

談到歌曲《不易》有份合寫歌詞，他說：「其實我第一首創作嘅作品就係學車嗰首廣告歌，曲詞都係我自己寫，當時只係當留個紀念。而自己真正試吓作曲就係《完埸前》，不過出咗街之後，發現麻麻，覺得自己都係乖乖唱歌算，之後同咗好多音樂人合作同交流，開始多啲創作知識，自己又開始試吓填詞，因為自己都未係咁叻，就同其他人合寫，諗住慢慢嚟！」

疫情收入大減，世豪直言有所影響，他說：「一直自己都係自資出歌，疫情期間冇得登台，但好彩仲有《愛回家》令自己有收入，仲可以喺音樂上面追夢，繼續出歌。其實要多謝黑妺姐，係佢畀咗好多登台機會我，可以出埠去世界各地表演，嗰幾年做咗百幾二百場騷，令自己成長得好快，學咗好多唱歌同表演嘅技巧。」