古天后日誌｜恒指暫於20800至21000爭持

4月20日，大致多雲，有一兩陣驟雨，早上有薄霧，日間有短暫陽光。雖然30年期美國國債孳息率升穿3厘，創2019年4月以來新高，美國聯儲局亦陸續有官員放鷹，不過美股喺略為超賣下出現技術反彈，隔晚三大指數向好，道指升499點；標指升70點；納指升287點。美股又踏入業績期，大摩警告受俄烏戰事及中國疫情拖累，加劇全球通脹，美企業績恐比預期更令人失望。企業嘅每股盈利將大幅下跌，並警告未來財政指引將被下調，不利股價表現。由於消費者相比一年前，對價格上升的接受程度減弱，意味企業被迫承受通脹壓力，削弱其毛利。

標指能否扭轉跌勢待觀察

追蹤基金資金流嘅EPFR Global數據顯示，截至13日該周，美股股票基金共有155億美元(約1209億港元)外流，為今年以來最大筆單周資金外流。美國銀行表示，投資者憂慮主要市場出現經濟衰退。大家熟悉嘅串流影視平台Netflix公布，於今年首季，付費用戶數淨減少20萬，至2.21億個，市場預期增加250萬個，Netflix付費用戶意外下降，拖累公司股價收市盤後急跌25.7%，報259美元。雖然美股隔晚係威係勢，不過標指剛好反彈至4450支持位之上，能否守住扭轉跌勢仍有待觀察。

至於港股呢邊，雖然內地宣布降準，但降準幅度不似預期，A股喺周一香港假期時彈咗一日，但噚日已打回原形，港股噚日更要下跌，反映自上月中見底反彈嘅一段反彈浪已於22400點結束，並再次掉頭向下。以3月中底位約18200反彈至22400點計，黃金比回調0.382先見20800，噚日大市亦已於該水平暫找到支持，不過睇返牛證重貨區喺20500-20800點，估計是次回調乘機劏牛亦順理成章，而20500點剛好係黃金比回調0.5。若然外圍或內地股市偏軟，再加上有任何利淡消息影響下，繼續下調黃金比0.618的話，港股呢次回調可以下試19800至20100點，剛好回補3月17日所遺下嘅上升裂口，呢段時間仍不宜重倉，有心水股份想買入，亦只宜分段收集。

古天后

(徐狄怡，證監會持牌人)