獨家丨黃德斌演繹首富好過癮麥子樂自問做唔到擦鞋仔

2022-04-12 08:00

「亞洲心動娛樂」自家網劇《逐流時代》中，黃德斌飾演財大氣粗嘅首富，同攀上流嘅麥明詩有激咀戲及牀戲。德斌形容角色幾過癮，尤其可以代入嘻嘻哈哈看世界。當問到德斌可有響往上流社會生活時？他坦言，活在當下做自己，試到唔同角色最好。採訪：方騫平攝影：沈健程

黃德斌及麥子樂相隔十多年再合作。

劇中黃德斌及麥子樂跟麥明詩有多場激咀情慾戲，其中麥明詩穿三點式出鏡嘅片段，亦製造咗唔少話題，兩人大讚麥明詩夠索，不過黃德斌卻說：「嗰場我避開咗。」至於麥子樂就猛話蝕咗，到場時對方經已上咗水，所以鏡頭前嘅流口水反應只係望住攝影師。黃德斌喺《大叔的愛》同Anson Lo（盧瀚霆）爭Edan（呂爵安），角色大受歡迎。對於演繹同性戀及異性戀，德斌形容各有難度，最重要係有愛。

麥明詩三點式演出成為劇集亮點。

戲中麥明詩為攀富貴，主動走近黃德斌。

黃德斌及麥子樂都想體驗做吓富豪。

德斌堅持同《大叔的愛》原班人馬可以試新嘢，唔好拍續集。

麥子樂面皮唔夠厚
黃德斌曾經演過同性戀、性無能、太監等較複雜的角色，慶幸得觀眾接受算係好好彩：「其實首富呢個角色都過癮，邊個唔想做富豪呀？演戲掂到生活中接觸唔到嘅世界。」至於麥子樂就演向上爬嘅「擦鞋仔」，忍氣吞聲埋黃德斌身，他強調現實中無能為力：「原來做擦鞋仔，首要條件係面皮厚，我一定做唔到。」德斌坦言遇過唔少「擦鞋仔」，他堅持每人做唔同嘅嘢，只要唔影響人就得。