古天后日誌｜為求穩經濟 內地月內或降準降息

4月7日，天晴，日間天氣炎熱及乾燥，未來幾日繼續天清氣爽。美股隔晚繼續下跌，道指跌144點；標指跌43點；納指跌逾2%，跌315點。美國聯儲局公布3月份議息會議紀要，指該局官員就需要每月將資產負債表縮減950億美元達成共識。另外，會議紀要指出，「許多參與者」認為，一次或多次加息半厘，將可能係對國家物價穩定風險嘅適當反應，而如果沒有發生烏克蘭事件，大部份官員可能會要求喺3月份加息半厘。

美國出現孳息倒掛，但摩根資產管理亞洲首席市場策略師許長泰指，即使近期2年期及10年期國債孳息率屢次出現倒掛，但喺聯儲局多次實施量化寬鬆後，以孳息曲線預測經濟衰退未必準確，短債孳息率升幅高於長債反映市場對通脹預期，料債息倒掛情況將持續3至6個月。佢認為，美國工資升幅仍強勁，有助抵銷商品價格上升影響，料美國陷入滯脹嘅機會唔大。佢解釋，通脹料將持續上升，聯儲局為此加快加息，令短期息率上升，但喺聯儲局開始縮減資產負債表後，長期息率亦會上升，但升幅應較少，令債息倒掛持續，且倒掛幅度或較過去歷史的約20至50點子更大。

其實美國收緊貨幣政策，已經講咗一段時間，但市場隔晚對隔聯儲局3月份嘅議息紀錄似乎有啲過敏，不過納指已從高位回吐咗5%，而標指則逼近4400-4450呢個重要支持位，留意美股一旦失守，後市將要提高警覺。

至於港股呢邊，噚日恒指回試22000支持，暫時失守10日線21978，留意20日線21361不能失守，否則港股反彈浪可確定結束，但喺短線超買下，正常回調有助後市更健康發展。不過俄烏局勢目前仍然係市場最大隱憂，至令各地股市升勢受阻。

另一方面，中國公布財新3月中國服務業採購指數(PMI)跌至42，為過去一年低位，新出口訂單指數回落至年內低位，因受疫情影響。首季完結，中國將公布第一季度經濟表現，市場估計增長3.5%至5.1%。若數值於下限，料中央將積極推出措施刺激經濟。估計首季應維持平穩運行。國內股市表現平穩。週三國常會中提及，會透過穩增長去創造貸款需求，並拉動信貸投放，簡單嚟講，阿爺將透過加快基建投入以拉動經濟。政策中提及拉動信貸，增加對農業、小微企及民企嘅貸款支援，市場預料4月有降準可能，呢個亦係古天后睇好4月份中港兩地股市嘅原因。

古天后

(徐狄怡，證監會持牌人)