格林美獎丨防彈V主動走近天后Gaga求合照約Jon Batiste食飯教韓文

2022-04-05 19:00

昨日在格林美獎大熱贏得年度新人等3獎的美國歌手Olivia Rodrigo，在頒獎禮後捧3獎影相，卻蝦碌弄跌一個獎，獎座即解體成兩截，她只能張大口作出反應；12年前的天后Taylor Swift亦經歷相同的事。Olivia在昨日表演中跟防彈少年團(BTS)成員金泰亨(V仔)表演咬耳仔，他亦成功冧爆天后Lady Gaga，獲Gaga錫面送抱及面貼面打招呼兼合照。

BTS齊人出席格林美獎。

Olivia在後台弄跌一個獎座，獎座即斷成兩截。

Olivia昨在格林美贏年度新人等3獎。

V同Olivia喺台下好好傾。

咬耳仔。

ARMY（BTS Fans稱呼）都知道Lady GaGa是V仔的偶像，有在格林美現場的觀眾就拍攝到頒獎禮後，V仔由工作人員陪同快步走向GaGa面前，有靚仔兼超級紅星埋身恭敬彎身打招呼，GaGa都好受寵若驚即刻起身，見V仔係咁摸住心口同偶像講嘢，講咗幾句V仔即攬實GaGa，然後V仔將手提電話遞給工作人員幫忙拍照，影完相GaGa即摸V仔面豬又搭住對方膊頭疑似作出鼓勵，只見V仔笑住滿足離開，國際巨星追星行動歷時1分鐘。

V仔急步行。

彎身同偶像打招呼。

V仔摸住心口自我介紹。

攬攬偶像先。

Lady GaGa搭住V仔膊頭。

合照咯。

V仔笑住走。

V仔尋晚都有出合照PO，但之後Delete咗。

V除了跟Olivia咬耳仔外，亦冧掂Gaga。

V跟Gaga面貼面。

頒獎禮後，BTS慣性開LIVE講感想，七子坦言連續兩年失落最佳流行組合獎好失望，又提到表演前得一日綵排，綵排時亦冇提供音樂，好彩唱片公司有預備藍芽喇叭。另外V仔亦提到佢係GaGa忠實Fans，主動打招呼及合照非常緊張，隊友都笑住讚佢好勇敢。

七子開Live講感受，V仔亦有透露同Lady GaGa講乜。

而V仔除咗跟格林美大贏家兼年度專輯得主，爵士歌手Jon Batiste合照外，昨晚亦相約對方食Dinner，V仔出Po留言話「好好食」，而Jon Batiste除轉發V仔Po外，亦上載V仔教佢講韓文嘅片段，V仔教佢講三組字，分別係見到面、好開心同埋我食飽嘞，講完兩個人齊齊大笑，V仔交到新朋友話唔定兩人好快有機會合作。

此外，格林美獎直播收視出爐，有893萬觀眾收看，只較去年史上最低收視高約13萬觀眾。