獨家丨梁梓禧自嘲夠命硬捱得過　搞兒童才藝學院4年蝕住做

2022-03-26 20:45

梁梓禧（Roland）18年首次做老闆，跟4名股東合資7位數，開設「香港兒童才藝學院」（HKKTA），可惜接連遇上社運及疫情，雖然首創網上教學應變，但4年來蝕住做，而第5波疫情前打算擴充，最終反而搞到蝕錢收場，他苦笑謂勝在夠命硬捱得過，展望即將放寬社交限制，學院可轉虧為盈。

採訪：杜杜

Roland在18年跟4名股東，合資7位數成立學院。

當日學院開幕，Roland跟一班股東和導師合照

學院成立不久由天后搬到鰂魚涌，19年再到黃埔開分校卻遇上社運，不足1年被迫放棄，半年後轉到新蒲崗延續開分校目標又撞上疫情。梓禧形容過程如一趟看不到盡頭的過山車，「跟幾位拍檔喺第一波就已經變陣，把年度嘅實體課程改為線上學習，我哋當時係全港第一間學校用線上教學，我之前提議仲畀拍檔笑，後尾連正規學校都用線上教學。」他承認線上學習，甚至做綜藝表演，事前和事後工作比上實體課多，「事前我哋要改晒啲課程，令到小朋友對住個Mon上堂，都可以集中到，而綜藝節目亦要分別幫小朋友拍佢哋表演部份，之後再做後期剪輯，真係好花功夫同時間。」

Roland親自負責教授口才班課程。

疫情下，學院的實體課被迫改為網上上堂。

擴充不成反蝕本

梓禧認為改變經營策略的同時，最慘是幾年來跟股東們看不到前景，「真係既迷失又無助，呢幾年真係蝕住做，仲要完全冇得計劃，睇住啲學生冇得上實體課一個個退學，唔知學院能夠捱到幾時，最無奈唔係淨係我哋難捱，香港大部份小企業老闆都咁慘，唯有慶幸我哋唔係租地舖。」去年下半年，他以為有曙光，毅然幫分校搞擴充，結果又再一次失敗收場，「大家靜咗太耐，嗰排可以上返堂，我哋係爆晒㗎！同拍檔諗住可以賺返之前蝕咗嗰啲，見到新蒲崗有個一層單位平靚正，點知一租就爆第5波，我哋冇諗過會咁嚴重，點知白交咗3個月租，都係頂唔順，仲要蝕咗5位數裝修呀！哈哈，好彩我夠命硬，仲未死得！」