基斯迫孖仔生日扮「雷神」　曾呷醋兒子鍾意超人

2022-03-23 01:00

在漫威宇宙中飾演「雷神」的基斯咸士禾夫（Chris Hemsworth）與太太Elsa Pataky育有三名子女，其中一對八歲孖仔日前生日，基斯在ig分享囝囝着上雷神造型的相慶祝，更寫上：「兒子八歲生日快樂！如果你問我佢哋可唔可以着雷神以外嘅超級英雄裝扮，答案係唔得。」一對孖仔舉起雷神鎚的樣子有點不情不願。

雷神在電影中好型，可惜囝囝唔多Like。

基斯去年上載兒子扮超人的照片，更扮嬲的瞪着鏡頭。

原來基斯囝囝心目中的超級英雄並唔係老竇，而係漫威死對頭DC的超人，去年基斯亦在網上Po相，當時他怒瞪鏡頭，更寫上：「我問過囝囝佢大個想做邊個超級英雄，佢話想做超人，好彩我仲有兩個小朋友！」看來佢對囝囝冇興趣做雷神好冇癮。

其實唔單止雷神，其他超級英雄都有呢個煩惱，「星爵」基斯柏特（Chris Pratt）的兒子在萬聖節當日就一定要扮成美國隊長出門；至於「鐵甲奇俠」羅拔唐尼（Robert Downey Jr.）就在清談節目中大爆兒子偶像是「鷹眼」，有一次他教唔掂囝囝時，打電話給「鷹眼」謝洛美維納（Jeremy Renner），請求他幫手教仔，認真搞笑。