獨家丨何超蓮抗疫大意摸完口罩又捽眼返港急購保濕用品

2022-03-20 22:00

30歲何超蓮同33歲竇驍拍拖三年屢傳婚訊，最新有月初傳超蓮奉子成婚，瘋傳多日，竇驍先發文否認，表示突然收到一堆祝福，直言：「謝謝大家厚愛」。因為疫情，為怕經常要隔離，超蓮近年多留在內地工作及陪男友開工。日前抽時間回港即出銅鑼灣買護膚品，見超蓮手多多成日搞個口罩，搞完又捽眼，小心啲好喎。採訪:梁志明

何超蓮同男友竇驍自公開戀情後經常高調晒恩愛，拍拖好開心唔怕畀人知，所以隔一排就會傳兩人結婚，超蓮回應一兩次後都懶理。今年情人節，兩人一齊講住泰文嚟拍片，相當搞笑，期間竇驍又輕撫超蓮個頭仔，冧到女友笑到瞇晒眼。

兩人拍拖3年屢傳婚訊。

對於又同超蓮傳結婚，竇驍出PO回應。

本年情人節的泰文放閃PO，佢哋兩個好搞笑。

約友行街好傾
眼見疫情嚴重，向來熱心公益的何超蓮亦捐出7,000個快速檢測包予機構，有愛心又靚的超蓮出PO表示略盡綿力及為有需要人士送上心意，同時佢亦為醫護打氣。不過日前記者撞到超蓮同女友人去銅鑼灣行街，前者先陪後者去買凍肉，超蓮喺店外等候時已經開始搞自己個口罩。

何超蓮發佈正能量，為有需要人士送上心意。

超蓮同友人可能好耐冇見，邊行邊傾邊笑。

超蓮等朋友買凍肉時，企喺街已經開始手多多。

忍唔住手多多
買完凍肉，兩人就去買三文治，見超蓮一去到櫃位就有心水，睇嚟係熟客，畀錢時，超蓮可能突然鼻痕就拉開口罩去處理，呢啲咁高危嘅行為下次真係咪制呀。買完嘢食再去買護膚品，聽到超蓮咁同店員講，「成日要返內地，好凍又好乾。」店員介紹佢用最貴228蚊一支的保濕乳，皮膚質地好，要急救都唔使買超貴又超潤的護膚品，不過，慣性摸口罩嘅超蓮又忍唔住，今次仲要摸完口罩再捽眼，呀男友真係要提提佢呀。