古天后日誌｜沽空盤冚倉帶動回升 能否更上一層樓睇阿爺點做

3月18日，大致天晴，日間炎熱，周末期間保持天晴。美國公布就業數據好過預期，美股轉跌為升，道指已連升四個交易日，隔晚再升417點；標指跟納指則分別升53點及178點。俄烏談判未有進展，油價反彈8%，「股神」巴菲特投資旗艦巴郡近期大手增持美國傳統能源巨頭西方石油(Occidental Petroleum)股份，外界正揣測巴菲特是否想買下整家西方石油。留意今晚美股四重期結算，由於未平倉合約較過去數季為多，涉及3.3萬億美元衍生產品，預期今晚美股價較波動。 至於港股喺一個月內跌逾6000點後，周三阿爺總發功維穩，並指將嚴懲惡意沽空，淡友不敢怠慢，急忙冚倉，帶動港股兩日狂逾3000點，噚日重上21500水平。周二港股以大成交跌至18200水平，連續兩日喺冚倉盤帶動下，成交額更進一步升至3000億水平。若然呢兩日嘅報復式反彈，純屬淡倉冚倉行動，即回補空倉後，冚倉貨係無食糊沽出嘅需要，亦即港股急彈後，唔會出現大量沽壓，是故港股可能僅作輕微回吐，整固後又可以從新出發。問題係呢兩日靠冚倉盤推升後，指數權重嘅科技股，中概股等，仲有冇本事繼續向上，帶動港股進一步收復失地？ 呢個問題就要視乎投資者信心，重磅科網股跟中概股被肆意沽空，主要係過去一年內地不斷對不同行業，尤其科網行業進行接二連三監管行動，官媒則配合發功，持續發文批鬥平台龍頭企業，令國際投資者信心盡失，對沖基金當然把握機會瘋狂沽空呢批股份。適逢美國SEC警告幾間內企或被除牌，更觸發周初中概股崩盤。直至周三阿爺補鑊，出嚟維穩，港股方能從水深火熱出走出嚟。,不過阿爺呢次出完術，實際對行業監管會否口不對心，暫時仍待觀察，若然仍未能定下清晰指引，令國際投資者拾回信心，港股後市仍捱。

古天后

(徐狄怡，證監會持牌人)