古天后日誌｜東西金融戰加速各國貨幣數碼化

3月11日，大致天晴，日間乾燥，日間天氣和暖。俄烏最新一輪談判，依舊無結果，美股受戰事持續所拖累，三大指數尾市跌幅雖收窄，但三大指數續跌，道指跌112點；標指跌18點，納指跌125點。

雖然隔晚美股三大指數跌幅收窄，但中概股被血洗，美國證交會(SEC)臨時公布，5家面臨強制退市的外國公司，包括再鼎醫藥(09688)、百勝中國(09987)、百濟神州(06160)、和黃醫藥(00013)及ACM Research，原因可能係受審計師註冊地嘅外國機關限制，美國公眾公司會計監督委員會(PCAOB)無法對該公司進行完整審查。呢幾間中概股會被放入《外國公司問責法》識別名單，該名單確認日期為3月8日，若相關發行人認為被錯誤列入該名單，最遲要喺本月29日向SEC提供證據。市場憂慮更多中概股被退市，搞到O的中概股出現顯著跌幅。

另一方面，俄烏戰爭以嚟，同時亦掀起東西方金融大戰，貨幣博弈上演，自俄烏戰事爆發以嚟，俄羅斯盧布迭創新低，兌每美元狂貶逾三成；人民幣與美元幾乎同步升值。基於盧布交易受限，為逃避制裁，俄企將增加對人民幣資產和結算需求。近期有部分從新興國流出的資金，轉投人民幣避險，尤其俄國資金。隨着人民幣嘅交易需求增加，預計喺國際支付佔比將提升。即使日後局勢緩和，人民幣兌美元或貶值，惟料幅度有限。

為保美元地位，對抗人民幣威脅，拜登已簽署行政命令，敦促聯儲局探索央行應否介入並創建央行數碼貨幣(CBDC，即數碼美元)，其中一個關鍵舉措喺指示美國評估推行CBDC所需技術基礎設施。目前已有9個國家已推出CBDC，包括中國在內16個國家已開始研發此類資產。由於數碼資產可能會產生額外經濟及金融風險，監管方法亦需「度身訂造」。

貨幣戰的趨勢係數碼化，市場一直期待各國對虛擬貨幣訂出明確監管法規，既可保障投資者，亦可提供明確指導以允許公司喺虛擬經濟中進行創新，讓行業發展更有保障。不過喺國際貨幣數碼化發展同時，非國家貨幣嘅虛擬貨幣走勢未見突出，當中最具應受性嘅比特幣，目前價格仍維持喺4萬美元之下。

古天后

(徐狄怡，證監會持牌人)