獨家丨張偉文棲身醫院戶外帳篷十小時終送房 方俊感觸：有生離死別感覺

69歲「靚聲王」張偉文喺太子一間安老院舍受感染，昨日初步確診新冠肺炎，昨晨被送往廣華醫院，但直至傍晚仍然未接獲院方進一步消息，加上張偉文舉目無親，兼且行動不便，又患上腦退化症不善表達，經理人兼監護人方俊(Aman)既擔心又焦慮，昨晚六時多決定走進高危嘅醫院去「尋親」。

幾經辛苦張偉文和方俊終於喺醫院見到面。

跟方俊相見一刻，張偉文心情都好激動。

醫院情況慘不忍睹

方俊接受本報記者訪問時表示，疫情下嘅廣華醫院急症室爆滿，候診患者超多，部份依然喺戶外搭建嘅臨時隔離區帳篷內等候，昨日天寒地凍，加上整日落雨，情況慘不忍睹，當時他遠距離見到張偉文臥牀喺帳篷內，只係覆蓋住一張毛毯，估計張偉文喺戶外帳篷內等咗超過10個小時。及後經他查詢及了解，最後張偉文才被送往急診室旁嘅負壓病房內，他終可以隔住玻璃窗跟張偉文揮手。

天寒地凍下嘅廣華醫院，部份候診者仍棲身喺戶外搭建嘅臨時隔離區帳篷內等候。

晚上方俊親自去醫院了解。

方俊要戴上健康手帶才能走進急症室內。

似經歷生離死別feel

方俊形容喺慌亂下終於跟張偉文相見，大家都好似經歷咗生離死別feel，當時相當感觸：「我見佢一臉倦容，好無力咁向我揮手，見返『親人』眼神好有安全感，不過今次相見後，疫情下唔知幾時可以重逢，我哋感觸到眼濕濕，個心真係好酸，最慘我愛莫能助，只係問醫護『究竟佢食咗嘢未？』」

初步確診嘅張偉文情況算係穩定。

方俊多年來有情有義咁照顧張偉文。

更多第5波疫情資訊，請到以下專頁瀏覽
按此  (https://bit.ly/3JqiBzz)

立即下載 | 全新《星島頭條》APP :  https://bit.ly/3yLrgYZ