疫情消息｜懷孕29周確診 港媽網上直擊：肚皮打薄血針直到BB出世

新冠病毒肆虐，人心惶惶，有港媽以「懷孕第29周 不幸確診了」為題，由昨日至今日在網上討論區親子王國，發表驚心動魄的親身經歷，坦言一知道檢查陽性結果，「我啲眼淚好不自覺咁流出嚟。」「早兩日私家診所睇到BB先兩磅，如果而家出世好驚有啲咩事，然後姑娘教我打薄血針打係肚皮，之後每二十四小時打一次直到bb出生。」

該位港媽昨日晚上九時十四分開始發帖表示：「琴晚無端端發燒，已經好驚，冇傷風 流鼻水 喉嚨痛，但係成個背脊同小腹都痛，早上七點幾去咗那打素，做咗個快速測試，可能自己撩得唔好，第一次結果係陰性，以為可以鬆一口氣。」

「咁姑娘就建議幫我叫架白車去威爾斯婦科入院做個檢查，11點幾去到威爾斯，入院前要再做多次快速測試同埋吐口水檢查，今次係兩條線，陽性。我啲眼淚好不自覺咁流出嚟，好驚影響到BB，唔知點算好。」

「然後佢哋幫我安排咗一間產科負壓病房，然後仲有好多檢查要做，首先鴨嘴夾攞分泌物檢驗，然後check BB心跳正常，陰超同超聲波正常，然後係咁抽血，然後我就要喺度等口水嘅檢測報告，然後仲有好多文件要我簽，都係有啲咩事要開刀嗰啲同意書，我一路簽一路喊。」

「早兩日私家診所睇到BB先兩磅，如果而家出世好驚有啲咩事，然後姑娘教我打薄血針打係肚皮，之後每二十四小時打一次直到bb出生，晚上八點幾，報告終於出咗，證實感染COVID-19，而且病毒量高，我又頓時覺得好徬徨，點解會咁，我淨係驚病毒會影響到BB，然後決定問吓醫生如果而家提早開刀拎BB出嚟風險會唔會冇咁大。」

她其後在今日下午四時多，繼續發帖交代目前情況：「第一晚11點幾左右， 醫生話bb一切正常亦無早產跡象，所以决定幫我安排轉到內科隔離病房，因為有另一位媽媽更需要呢間產科負壓房，轉到落去今次係有一位roommate，而佢都係一位確診嘅準媽媽，佢無點發燒，只係咳，而且病毒量比我少，然後12點幾就有醫生推部x光機入嚟幫我哋兩個照下個肺睇下有冇花，佢會有一塊硬硬地既物體俾你遮住個肚，照前醫生話其實29周bb已經成形，影響不大所以都無得擔心。」

「瞓醒第二日，bb今日30周喇，一早就有婦科醫生入嚟幫我哋照超聲波、量血壓、篤手指，中午就check胎心，一切正常，我都鬆一口氣，但我keep住反反覆覆都有發燒，希望我可以打敗病菌啦。」

網民們紛紛留言為港媽打氣：「祝你大步檻過，吉人天相。」「媽媽加油呀！好好休息，快啲好番！你同bb都平平安安。」

 

帖文轉載自「親子王國」

更多新冠疫情資訊請到以下專頁瀏覽：（按此）

立即下載｜全新《星島頭條》APP：https://bit.ly/3yLrgYZ