古天后日誌｜疫情結束係對抗通脹最佳良方

2月16日，部份時間有陽光，早晚較為清涼。俄烏局勢似有降溫跡象，俄羅斯撤走部份軍力，加上美國本土疫情開始受控，推動美股隔晚反彈，三大指數結束3日跌勢。道指升422點；標指升69點；納指彈逾2%，回升348點。雖然聯儲局再三強調通脹可控，但反映供應鏈上游物價的美國1月生產物價指數(PPI)按年增長9.7%，高於預期，聖路易聯儲銀行行長布拉德忍唔住再「放鷹」，指7月前要加夠1厘息，建議聯儲局喺通脹高企下應提早加息。

而有關通脹爭論，以及地緣政治危機加大市場壓力，加上聯儲局收緊政策無法解決供應鏈問題等推動通脹壓力的因素，但可能導致經濟增長周期結束，進一助長市場嘅避險情緒。有分析指成功結束疫情，就係緩解通脹壓力嘅最佳藥方，隨住新增感染人數下降，經濟可以恢復正常運作，員工可以重返職場，供應鏈瓶頸問題可以迎韌而解，消費支出可以轉向服務而唔再係商品。解決疫情喺對抗通脹方面嘅效用，遠比聯儲局可以做嘅多。可幸嘅係，美國過敏興感染疾病中心主管福奇接受外媒訪問時也表示，該國嘅疫情正「脫離全面大流行階段」，新增確診病例也顯著下降。

至於港股暫時升至24800水平後整固，市場焦點去返業績股，較受市場注意嘅當然係下星期大笨象(00005)公布季績，市場普遍預期大笨象可能增加派息及加大回購力度，對其股價帶嚟支持，不過60元呢個位唔係咁易突破，加上過去兩個月大笨象累計升幅唔少，小心業績公布後反而會好消息出貨。

而中芯國際(00981)剛公布第四季業績，收入及盈利均保持增長勢頭，而管理層展望正面，營運前景良好，有利股價重拾動力，支持走勢短線反覆做好。加上恒指服務公司將於本周五收市後公布季度檢討結果，中芯係有機被納入成份股嘅股份之一，唔排除呢幾日有染藍炒作，不妨留意。

古天后

(徐狄怡，證監會持牌人)