諸朋戀友丨陳展鵬爆單文柔要求勁夢幻 郭子豪回應「被分手」傳聞

今年西方情人節與中國傳統情人節僅相差一天，別具意義；TVB昨晚播出《諸朋好友》特別版《諸朋戀友》，請來3 Pair恩愛夫婦：陳展鵬及單文柔、黎諾懿及太太李潔瑩、徐榮及太太Kathy，還有熱戀中的情侶陸浩明與女友Ayan，大談相戀經過，及不為人知的笑料。除了「放閃族」，節目還請來「單身貴族」方力申、郭子豪、孔德賢、連詩雅、江嘉敏及游嘉欣擔任嘉賓，早前盛傳「被分手」郭子豪更親身回應情變傳聞。

結婚三年的陳展鵬（煎Pan）及單文柔（Phoebe）在節目中表現恩愛，由於Phoebe經常詞不達意，煎Pan與黎諾懿不下一次聯手取笑她，Phoebe則全程「任窒唔嬲」兼笑至合不攏嘴。煎Pan還大爆Phoebe是「夢幻型」，經常希望老公能像劇中角色一樣浪漫，他苦惱謂：「情人節最冧嗰次我送咗100枝玫瑰花，佢成日不停咁喺度搵我拍劇嗰啲嘢出嚟（要我對佢做番），但拍戲唔使我出錢畀㗎嘛。」黎諾懿搞笑搭嗲謂：「調佢去劇組，咁就唔使煩喇。」另Phoebe透露當年與老公出發前往英國影婚紗時波折重重，煎Pan為了氹太太開心，更來回喪跑四十多層樓梯。

 

兩Pair人大放笑彈。

Phoebe講番當年煎Pan點追求佢，過程既甜蜜又搞笑。

 

徐榮同太太Kathy結咗婚16年都仲好恩愛。

陸浩明同佢女朋友冤氣到暈。

 

黎諾懿則搞笑稱被老婆嚴禁在家「講壞話」：「佢依家唔畀我喺阿囝面前講佢壞話，因為我本身好鍾意講人壞話嘅。」至於徐榮，則被太太Kathy爆料指每次只要演奸角，就會變得「好難頂」：「佢一拍奸嘅角色就最難頂，佢會好惡。」徐榮只能無奈回應謂：「我係衰嘅，搵我老婆嚟試戲、試反應。」

至於單身貴族的訪談部分亦相當精彩，當中尤其單身身份成疑的郭子豪花生指數最高，對於盛傳「被分手」，子豪解釋消息傳出當日與女友鄧卓殷（Amber）正安坐家中齊齊看電視，接到傳媒朋友致電詢問分手一事時，他亦有即時告知女友；最後不知如何應對媒體朋友的他，當時是這樣回應的：「我話做緊嘢，轉頭再打過畀佢。」

郭子豪話傳聞傳出嚟嘅時候，佢同女友喺度排排坐睇緊電視。

單文柔好鍾意夢幻感覺。

《諸朋戀友》眾嘉賓參與好熱鬧。

更多第5波疫情資訊，請到以下專頁瀏覽（按此）

立即下載｜全新《星島頭條》APP：https://bit.ly/3yLrgYZ