古天后日誌｜恒指周五季檢 惟炒作憧憬已減弱

2月14日，多雲，日間部份時間有陽光，早晚清涼。美股上周受收水及俄烏問題困擾顯著下跌，道指跌503點；標指跌85點；納指更跌近400點，跌幅達2.78%。受美股下跌所拖累，港股上周喺ADR亦跌1%，回落247點至24658。美股受俄烏局勢緊張影響而下跌，油價卻因此一再上升，紐約期油上周五盤中曾升逾半成，高見94.66美元，為為2014年9月30日以來的最高水平，全周計累升0.85%，周五報收93.1美元。

美國上周五有傳媒引述知情官員報道，華府相信俄羅斯總統普京決定入侵烏克蘭，已經向軍方傳達呢個決定；又預料最快呢個星出手，先發動空中轟炸及電子戰，之後地面進攻，目標唔排除係實現烏克蘭政權更迭。白宮回應時表示報道內容不準確，但承認現時形勢迫在眉睫，俄軍收到命令後可以隨時進攻。俄烏問題預計喺呢個星期仍然左右美股去向，美股本周持續不明朗。

至於港股喺大圍股市走勢偏軟下，當然難獨善其身，除O左地綠政治局勢緊張之外，本地疫情亦似愈控愈失控，連日確診數字屢創新高，市場而有類似封城傳聞滿天飛，雖然暫時香港未必會全面封城，但嚴格嘅社交限制已足夠打殘日常經濟活動，而個別地區疫情爆發嚴重，唔排除唔封城但封區，封鎖個別地區進行大規模檢測。留意相關措施一旦實施，定必影響投資情緒，屆時港股或再有震動，留意恒指24400點，即10日、20日及100日線匯聚處能否守穩，此處為後市能否進一步向上嘅關鍵。

另一點要留意係本周五恒指服務公司於收市後，將公布季度檢討結困，為趕及年中將藍籌股數目增至80隻，有機會於本論季檢加速擴大成份股數量。不過睇返之前嘅紀錄，染藍後嘅成份股新貴，走勢均見走樣，跑輸大市，隨着恒指擴容攤薄成分股權重，「染藍大熱門」事前未必再炒得起。由於成分股數目增加將攤薄流入新進藍籌的資金，且股份所佔權重上限由原先最多10%降至8%，令重磅藍籌嘅「吸金力」大不如前，市場對潛在藍籌嘅炒作憧憬已減弱。

古天后

(徐狄怡，證監會持牌人)