陳煒對未婚夫有讚冇彈受疫情影響婚禮見步行步

2022-02-02 07:00

日前陳煒拍攝娛樂新聞台賀年節目，接受主播許文軒(Edmond)訪問，大談過年感受。煒哥表示母親屬北方人，以往年三十晚也會包水餃，她說：「過年一定食得豐富啲，不過人愈大愈想過得簡單，之前都有好多人想試我手勢，試過親手煮鮑魚、花膠、鵝掌，將煒哥的味道送去朋友屋企，大家都好開心。」

談到與男友的婚禮進度時，陳煒表示一切交由好朋友兼設計師何國鉦負責，她說：「我哋嘅感情好似兩兄妹，佢拍心口話要幫手，而家疫情嚴重，唔知到時點，見步行步。」對於男朋友，煒哥有讚冇彈，她說：「以前請朋友返屋企，我屋企啲貓會立即匿埋，但我第一次邀請男友到我家時，佢哋好乖，仲幫我招呼男友，我覺得呢個係奇妙嘅緣份。佢冇養過小動物，本身仲對貓毛冇敏感，佢寧願自己痕，都幫我照顧佢哋同餵佢哋食嘢，佢仲成日餵，搞到佢哋好肥。」問到男友為自己做過最驚喜的事，煒哥說：「求婚真係令到我好驚喜，本身佢性格係多過四個人以上嘅聚會佢就會啞咗，佢個人比較鍾意聆聽，估唔到佢叫晒我啲朋友嚟見證求婚，仲要唱歌，佢真係鼓起好大勇氣，令我好感動。」

陳煒希望虎年身體健康，她說：「老公畀好大自由度我，佢支持我繼續工作，我希望可以做多啲唔同類型嘅角色，希望有多啲變化畀大家睇，特別對人物傳記角色好有興趣。」