獨家丨環星歌手喜氣洋洋合唱賀歲歌 73歲尹光支持MIRROR

2022-01-30 13:00

虎年將至，「環星一哥」尹光日前率歌手康華、楊立門、方俊（Aman）、何婉盈、莫旭秋（Joe哥）及方麗盈等拍攝新春賀年歌，於大年初一中午開始喺環星娛樂網上頻道播出，跟觀眾拜年，當日歌手們着到金光閃閃及紅噹噹錄影，十分喜慶。

環星老闆張國林率台前幕後提前拜年。

「環星一哥」尹光壓軸錄影。

楊立門(左起)、歌莉雅、尹光、康華、莫旭秋、方麗盈、方俊個個有實力。

尹光走多元化路線唔怕後浪

光哥選唱《新春如意》，歌詞提及「快樂財運到...」他表示疫情下，近日好開心接到廣告，而且酬勞好好，冇被壓價。他笑說，雖然人氣組合MIRROR雄霸咗大部份廣告市場，但喺鏡仔嘅手指罅漏啲廣告出嚟畀佢已經好好喇！問到係咪過肥年？哥光話：「又唔使過肥年嘅，呢個時候主要係身體健康，百毒不侵！樣樣順利都就ok。」光哥有留意時下樂壇及有聽後生仔啲歌：「我甚至有聽15-6歲嗰啲年輕歌手唱嘅歌，只不過我唱唔到啫，（佢哋ok呀？）都ok，多啲樂壇新血嘛，其實大家歌路唔同，我啲歌大路啲，粵曲我又唱，大戲我又做，時代曲我又唱，rap歌都得，連電視劇主題曲都會唱，所以唔怕後浪推前浪。」

73歲尹光竟然有留意MIRROR。

聲夢傳奇為樂壇注入新血。

方俊開心張偉文健康有好轉

張偉文經理人方俊跟方麗盈合唱《恭喜恭喜》相當生鬼，兩人喺舞台合作咗10幾年好有默契。方俊最近為張偉文安排腰椎手術疲於奔命，加上受疫情影響住院期間不能探望，令方俊非常擔心，直至出院後，覆診時見張偉文腳部變得靈活，加上身體檢查報告大致良好，算係放下心頭大石，他希望新一年個個都身體健康。至於康華跟楊立門高歌國語版《恭喜恭喜》，不過男聲竟然落喺康華度。最近康華忙拍TVB新劇《法言人》，劇接劇冇停過，工作算係好穩定，事事順利。