古天后日誌｜經濟發展視乎防疫措施多於疫情本身發展

1月24日，大致多雲，初時有一兩陣雨及薄霧，濕度高，回南咁款。美股上周五續跌，三大指數以全日低收市，道指跌450點；標指跟納指分別跌84點及385點。大型科技股顯著受壓，Netflix業績後股價暴跌兩成，亞馬遜、Facebook母企Meta分別收跌5.95%和4.23%。總結全周，道指累跌4.58%；標指累跌5.68%，兩大指數均錄得2020年以來最差單周表現，並且已連跌3周。納指全周累跌7.55%，創自2020年10月以來最差單周表現。

本周焦點將會係明日及周三聯儲局會議，市場預期聯儲局或更快收緊貨幣政策，以應對通脹升溫。大摩投資總監更警告股市恐再跌一成，即使納指已從52周高位跌逾一成，但對後市睇法仍悲觀。由於聯儲局需要加速收水，對貴價股估值最為不利。不過疫情對經濟負面影響喺下半年將轉弱，屆時股市有望反彈。換句話講，美股上半年都唔會好得去邊，之前口口聲聲話要all in美股嘅缸邊友，睇嚟仲有排捱。至於港股呢邊ADR跟夜期跟住美股走軟，留意100日線( 24595)能否守得住，100日線守得住，港股後市又唔會太差。

不過港股除O左面對美股下調壓力外，第五波疫情愈演愈烈，稍為有起色嘅生意又再次被打入谷底，但政府對經濟支援政策又正擬逐步淡出，早前有傳「還息不還本」計劃可能於4月後退場，未知會否因應疫情作適度調節。一旦中小企開始要還本，財務壓力上升下未必頂得住，屆時或掀起中小企結業危機。受新一波疫情影響，上半年香港經濟唔會好得去邊，政府嘅「還息不還本」作為「低成本、高效益」嘅支援措施，理應要繼續做，以支持企業流動性。經濟表現要視乎防疫政策收緊，多過視乎疫情本身發展；其實西歐國家甚至新台幣，已接受跟病毒共存，香港跟內地卻堅持清零政策，若然防疫措施進一步收緊，企業難以正常營業，若然仲要一刀切中小企嘅支援計劃，中小企出現倒閉潮係意料中事。

古天后

(徐狄怡，證監會持牌人)