IT狗丨前財爺曾俊華驚喜現身撐創科讚Lokman演技好犀利

2022-01-15 18:30

前財爺曾俊華（John）粉墨登場，昨日在ViuTV劇集《IT狗》驚喜現身，與MIRROR隊長楊樂文（Lokman）做對手戲，擺出手指心心，展現風趣一面。曾俊華今日在Facebook上載與Lokman合照，及當日拍攝情況，留言：「好開心可以參與今次嘅電視劇演出。多謝Bowtie同ViuTV促成今次合作。多謝《IT狗》劇組、曾經同我合作過同一齊逛紐約波士頓嘅導演Lawrence Kan、楊樂文、彭秀慧、Martin同我一齊演出呢一幕。Lokman嘅演技好犀利，大家不妨留意一下。」他指《IT狗》是原創喜劇，內容講述IT人為求出路決定自己創業，希望觀眾看得開心之餘，亦要更留意社會上的創科發展。他續寫著：「畢竟好嘅創意同科技可以為社會進步帶嚟關鍵性嘅影響。希望香港可以繼續孕育更多好嘅創意同科技，支持創科意念堅持，前行。」

曾俊華開心能參與《IT狗》的演出。

當日拍攝後的大合照。

《IT狗》導演Lawrence亦在IG上載與曾俊華合照，透露二人相識經過：「時間回到2018年，世界未有疫情，地球還未倒轉，嗰次拍攝認識咗曾俊華John同佢太太Lynn。有幸可以跟住佢遊歷佢嘅大學MIT及Harvard，off camera嘅時候仲傾乜都得。John分享咗好多對香港創科嘅vision，以及香港創科嘅苦與樂。」Lawrence指在曾俊華身上學到很多，並感受到對方對香港創科嘅熱誠，令他萌生開拍《IT狗》的念頭。他說：「我話如果有一日真係可以拍得到，一定搵佢客串（唔知佢記唔記得）。到2020-2021年，嗰一個小念頭終於萌芽，其實喺劇本嘅時候已經寫咗曾俊華，當時有同事問『劇本嘅曾俊華？係真係曾俊華？』事隔幾年，我都係冒昧message John, 結果依舊親切嘅John一口答應。多謝Viu TV及Bowtie促成今次呢件事，成日都想好似外國Sit Com咁有呢一類嘅Cameo，呢一集對我來講特別有意義。」