古天后日誌｜港股反彈之路難行 二萬四水平壓力不少

1月11日，早上清涼，天晴乾燥，呢幾日涼返O的，不過香港嘅冬天已經唔算冬天。隔晚美股大玩過山車，市場喺明晚公布上月通脹數據前觀望，鮑爺喺聽證會表示美國經濟正以多年嚟最快速度增長，令市場一度擔心加息提早，加快收水，一度拖累納指跌逾400點，其後竟然扭轉跌勢，倒升6點收市，道指跟標指則分別跌162點及6點，但相對盤中跌幅大大收窄。

被譽為「神人附體」嘅細摩量化及衍生工具研究部首席環球主管科拉諾維奇(Marko Kolanovic)喺去年10月初市場充滿恐懼時，呼籲投資者買入股票，認為市場將消化債息高企影響。隔晚呢位大哥又呼籲趁低入市，指市場出現超賣，結果美股收市真係大大收窄跌幅。

其實對於息口趨升呢件事，市場應該有晒心理準備，而高增長股亦因此而大殺估值，雖然美股上月屢創新高，但唔少高增長已顯著調整，古天后對於美股後市仍有信心。尤其喺通脹升溫下，要對抗通脹，投資股市係不二之選。至於港股呢邊連彈三日，恒指已成功收復10日( 23306)及20日線( 23265)，加上北水回歸後，成交額有所回升，漸漸回復動力，喺傳統金融股帶動下，再加埋重磅科技股反彈下，恒指或有望進一步挑戰50日線( 24059)水平。

不過港股相對美股動力當然差一大截，預期恒指反彈至二萬四水平左右，將遇到唔少阻力，尤其第五波疫情爆發，令地產股表現強差人意，而科技股反彈亦亦難持續，主要係監管陰霾仍未散，加上內房債務問題持續困擾，令港股反彈之路顯得困難重重。

應付目前港股市況對策只有繼續以短炒為主，隨資金於不同板塊輪動，只有隨波逐流，值得留意係內地基建項目料會加快速度，喺穩經濟嘅主題下，基建相關股份料可穩步向上，重型機械股及鋼鐵水泥股或於本輪市況中，有較穩定表現，可以分段收集。

古天后

(徐狄怡，證監會持牌人)