古天后日誌｜三大問題困擾下 港股仍動彈不得

1月4日，天晴，稍後雲量漸多，明日開始間中有雨。美股喺今年首個交易日做好，雖然變種病毒繼續全球急速傳播，不過影響未有如原有市場預期，唔少地方選擇與病毒共存，未有再如往年般封城鎖國。美股三大指數上升，道指跟標指再創新高，道指升246點；標指升30點，納指則升187點。當中蘋果公司成為首間全球市值突破3萬億美元嘅上市公司。其他重磅科技股普遍做好，而分析指今年美股可保持升勢，只係升勢將會變得較為溫和，表現遜於去年，而整體波動將較大。

至於港股噚日先升後回，繼續無厘神氣，全日成交竟跌至不足700億元，今日北水回歸，成交料有所回升。港股喺舊年跌逾一成，目前已跌至偏低水平，目前喺20日線附近爭持，只要能企穩23500水平，反彈可望持續，但重點係要有成交配合，否則反彈不成，仍有機會向下探底。

當然缸邊友都望港股已喺上月搵出底部並逐步回升，但港股仍受三大問題所困擾，包括由恒大(03333)所引起嘅債務問題，持續困擾投資者情緒，而唔少房企嘅理財產品接二連三的債務重組商談未如理想，事情遲遲未解決，香港資本市場唔少大孖沙身家都縮水。

除O左內房債務問題，政策風險亦令個別板塊跌到體無完膚，當中科技股持續受監管問題所困擾，正因為恒指加入大量新經濟股，令恒指表現落後全球其他股市，單係ATMX已佔恒指兩成半比重，喺政策風險下，呢堆股份仍然動彈不得。

另一問題當然係中美角力，誠如古天后喺2018年中美爆發貿易戰時講過，中美之間有何爭拗，香港夾喺中間，難免成為犧牲品。結果喺呢幾年之間，港股表現一直強差人意，某程度係中美之間嘅角力，美國將個別中企列入黑名單，係會窒礙港股前進嘅一大原因。

總括嚟講，港股今年要向上突破，上述三大問題需要解決，如果呢三大問題仍未解決，港股仍難擺脫陰霾。唯一令港股殺出一條血路嘅係一旦美國對中概股趕盡殺絕，中概股選擇回流港股上市，或能帶動港股氣氛好轉，呢個或者係港股扭轉弱勢嘅一個契機。

古天后

(徐狄怡，證監會持牌人)