識貨2｜黃美棋歎靚和牛萌爆現心心眼 邵初零抵抗力嚇親Do姐

TVB真人競技綜藝節目《識貨2》昨晚（28日）播出的第二集，剩下5名見習主播繼續與現場各大商家「周旋」，當中「和味棋」黃美棋自言對食相當有要求，歎靚和牛時起晒心心眼兼起勢點頭；購物狂邵初完全「零抵抗力」，反被商家「洗腦」兼狂嗌OK，沒有小朋友的她最後竟選了尿片作推銷產品，主持鄭裕玲（Do姐）都即時被嚇親：「邵初好危險！同佢Shopping好易傾家蕩產，佢咩都啱嘅！」

邵初被叫初妹妹，即時派心心。

食嘢最受歡迎，Do姐都好有興趣。

男子組方面，以阮兆祥最受商家歡迎，不停有人大叫讚他靚仔，祥仔開心謂：「好似開演唱會咁，好開心！」期間祥仔吃貨上身，不停大歎美食，不過首集豪言要搣甩爛Gag求突破的他最終還是「Gag性難移」：「男人食海參，都唔知係咪海底針？」未知是否受祥仔影響，劉頌鵬吃完火龍果亦搞爛Gag爆金句謂：「做人要『屙』The best！」阮兆祥Gag王地位似乎受威脅！至於一蚊Joe，則以《東張西望》主持身份作優勢，力爭商家信任。

今晚（29日）播出的第三集，製作組準備了兩大遊戲集中考驗六位見習主播的記憶力，並分開男、女子組進行比賽，看看哪一組擁有最強腦容量！由於製作組相當蠱惑，所有問題設計極為刁鑽，六位見習主播即使背晒書、做足功課仍答不出正確答案！為了爭勝，兩組可謂茅招盡出，不但有人「偷聽」，更有人與製作組「拗數」，場面既混亂又好笑！結果兩組無一倖免要被罰飲檸檬汁及苦茶，眾人飲到面容扭曲，非常爆笑！

答錯問題要飲製作組特製嘅飲品，阮兆祥飲到面容扭曲。

女子組當然都無一倖免啦。