家謙送果醬早餐 軒仔：愛的滋潤

　　（星島日報報道）張敬軒前晚平安夜舉行第二場紅館演唱會，與觀眾齊倒數迎聖誕。當晚請來林家謙擔任表演嘉賓，「孖生兄弟」合唱兼互送禮物！
　　軒仔與林家謙合唱後，稱讚對方贏得核爆式的歡呼聲，又表示最初二人是在電台的電梯中認識，當時被指二人好似樣但不以為意，今次在舞台上面對面合唱，真的有照鏡的感覺，並指對方在音樂上奪得好成績，是時候開紅館演唱會。
　　林家謙就準備了兩樽果醬給軒仔做聖誕禮物，並笑謂︰「我見你咁淒涼，成日食白麵包，前幾日去買畀你，不過呢幾樽嘢有少少似你最近啲建築材料，有名堂㗎！呢樽係開心果，呢樽叫糊塗（胡桃）呀！你記住分開，唔好撈埋，好神奇，有說明書教你點食，每日三次每次兩匙……」軒仔亦抵死回應：「沒有想到自己的早餐會多了一份愛的滋潤，雖然樽嘢顏色唔係咁開胃，不過唔緊要，食落去最尾出來顏色都係差唔多。」
　　搞笑是原定林家謙獨唱讓軒仔落台換衫時，突然死拉住軒仔不放，軒仔幽默附和︰「你搞咩講到咁曖昧，你知道㗎，你要咩我都應承你……」家謙即回答：「我要樓啦……我要……」。至於倒數前，林家謙再度出場與軒仔合唱，此時軒仔已專誠換上一件以熊公仔砌成的聖誕樹歌衫，笑言給大家搶包山新衫迎聖誕，還鬼馬說要向謙仔回禮，着對方上前拆禮物，原來是幫他除衫，軒仔更抵死道：「你喺中間伸隻手入去就得！」引全場笑聲連連。此外，前晚完騷後，有工作人員清潔台面時不慎跌倒於樓梯中，幸好只是手部少少擦傷，並無大礙。