古天后日誌｜騰訊派送京東變相減持 京東短線難免受壓

12月23日，早晚有一兩陣雨，日間有短暫陽光，嚟緊聖誕假期天氣轉冷，下周一氣海更顯著下降。聖誕節假期將至，市場交投轉趨淡靜，不過美股隔晚反覆向好，三大指數上升，納指繼續跑贏。美股嚟講，香港呢邊嘅缸邊友，其中一隻最關心嘅股份，當然係Tesla(TSLA)，港股呢邊嘅電動車相關股份，升升跌跌都受其影響，跌O左幾日嘅TSLA終於重上1000美元，料可帶動比亞迪(01211)呢O的電動車股繼續反彈。

騰訊(00700)之前話要表決向小股東派發中期息，卒之有關決議嘅結果係向合資格股東持有每21股股份，獲發1股京東集團(09618)A類普通股的基準，以實物分派約4.573億股京東作為特別中期股息，相等於京東已發行股份總數約14.7%。以噚日收市價每股279.2港元計，擬分派的京東股份總市值約1277億港元。完成分派後，騰訊在京東的持股比例將由17%降至約2.3%。

騰訊話就話向股東派發中期息，但事實係變相減持京東，仲要係大幅減持嗰隻，今日京東股價難免受壓，即管睇睇260元支持位守唔守得穩，守唔到下一個較強支持要落到240元。騰訊呢招都算絕，自己唔想再持有咁多京東，又唔想喺街到批，皆因數量咁多，目前嘅市況要搵人接都唔容易，索性拎嚟回饋股東，一家便宜兩家著。

諗深一層，內地對於科網監管從未鬆過手，作為乖孩子嘅騰訊，生怕阿爺話佢同京東強強聯手搞壟斷，家陣大幅減持，雙方關係撇清，自然唔存在壟斷，咁阿爺係無說話好講。呢一次減持，對兩者嚟講，長遠未必係壞事，況且京東發展日漸成熟，亦唔再需要騰訊咁多back up，只係騰訊選擇喺市況飄搖之際嚟減持，短線難免對京東帶嚟壓力。

明日平安夜，港股只有半日市，缸邊友假日情緒濃厚，今日港股即使有反彈，喺入市意欲低迷下，預期欠缺成交配合，倒不如提早收爐，準備好放假狂歡。古天后就提早放假，明日專欄休息一日，下星期二回復正常。

古天后

(徐狄怡，證監會持牌人)