冼靖峰自爆儲錢開泰式放題 張馳豪望30歲前做老闆

TVB歌唱節目《聲夢傳奇》出身的冼靖峰（Archie）和張馳豪（Aska），日前在慈雲山出席活動，並充當「一日店長」向顧客及粉絲派發糖果及特飲，二人甫抵達現場即引來全場粉絲尖叫，場面熱鬧，他們亦識做地向大家揮手Say Hi，其間更主動跟粉絲逐一合照及傾偈，非常親民。

活動結束後，童心未泯的Archie和Aska不忘到一個逾5米高的巨型聖誕扭蛋樹前Chok爆打卡影相，睇到在場粉絲心心眼！首次充當「一日店長」的二人均大嗌好玩，Archie笑言猶如跟粉絲交換禮物般，Aska謂：「因為平時只係影相、簽名，今次可以送嘢畀Fans，同佢哋互動，真係好開心。」

 

冼靖峰同張馳豪主動跟粉絲逐一合照及傾偈，非常親民。

 

好貪玩，見巨型聖誕扭蛋樹即刻要扭番個。

 

問到可有興趣開舖做老闆？年僅23歲的Archie即興奮自爆一直恨做飲食生意，「大學嗰時都同Friend有研究過開咩舖，我哋都有Idea，但可惜冇資金。（想做咩？）泰式放題。」語畢他想了一想即搞笑地補充：「呢個都係唔好講，驚畀人抄橋呀，哈哈！（希望幾歲前圓夢？）30歲啦！」至於26歲的Aska稱正努力儲錢，盼於30歲前開一間白天賣咖啡、晚上轉型酒吧的食肆。

 

Archie做一日店長。

 

冼靖峰同張馳豪都想開舖頭做老闆。