Juicy叮｜鄰居鼠患嚴重 網民驚悉家翁借出愛貓捕鼠

柴米油鹽醬醋茶，鄰居之間借用是常事，不過有網民就被鄰居借去一隻貓去幫手捉老鼠。

「香港討論區」有網民指，之前朋友家中的貓生了幾隻幼貓，於是發文者就領取了一隻回家養，都飼養了一段日子。

發文者透露，「而老爺奶奶都好錫佢哋，當自己個孫咁。但尋日老爺同我哋講，鄰居話自己屋企有老鼠出沒，想問我哋借貓去捉老鼠」。家翁跟鄰居相熟，又不好意思推卻別人，所以就答應了鄰居借貓。發文者於是十分疑惑是否可行。

有網民指，「貓係認地方唔認人，你帶佢去陌生地方佢會唔慣，住得唔慣唔使指意佢幫你捉老鼠。」、「梗係唔得啦，依家啲家貓連老鼠都未見過仲話抓，陣間你隻貓有咩事受傷，你話點算」

有網民就提出，「如果你養咗貓，但你隔離屋仲有老鼠，咁有幾個可能性：你個區好多老鼠；你隻貓味唔夠，驅唔到鼠；你隔離屋好污嘈。基於以上因素，我覺得唔好借：一借借一排，如果你隻貓唔見，或有乜事，咁點；佢唔識處理咁隻貓走失咁點；貓好有情緒病，轉環境可能引起尿道炎；如果因你隻貓有啲古怪老闆問題...之後佢虐貓咁點，例如係你家唔瀨尿，去佢到就瀨。又例如你覺得貓抓嘢沒問題，但去到佢家抓爛佢啲嘢，咁又點。仲有好多原因。基於咁，唔好借」

有網民更擔心有衛生風險，「貓係有捉老鼠本能。佢肯捉一定捉到。不過，你要諗吓:佢兩隻手拍過老鼠，抓過老鼠，撳過老鼠。佢個嘴又含過老鼠，咬過老鼠，甚至食過老鼠。你得唔得先？」

不過也有人有類似經歷，「成四十年前，我屋企都試過借鄰居隻花貓捉老鼠，不過當時真係大家都冇所謂，而且當時啲人對貓又無咁矜貴，不過我諗依家無咁易肯借」

帖文轉載自《鄰居問我哋借貓去捉老鼠???》