Juicy叮｜打邊爐獲世伯夾未熟魚皮餃港女首次見家長即肚痾

2021-12-10 10:19

第一次見家長難免會緊張，生怕會為對方留下壞印象，唔通乜都要「硬食」？有港女表示，日前到男友家打邊爐，自己將魚皮餃放入鍋淥幾分鐘後，世伯便將魚皮餃撈起並放入她的碗中，結果她勉強將魚皮餃吞下，回家後卻連痾幾次，更需請假睇醫生！

該名港女在「香港討論區」發文，指自己日前首次到男友家中與其家人一起打邊爐，因不知對方家中習慣，故本已不期望他們會用公筷，最初都是她自己淥食物，或由男友代勞，後來氣氛慢慢熟絡，世伯及伯母都有夾餸給她，不過噩夢便就此展開。

打訪爐期間，港女曾將丸類及餃類放到鍋中淥熟，怎料世伯在數分鐘後便將魚皮餃夾起，放到她的碗中；她曾表示「啱啱放落去好似未得喎」，但對方堅稱沒有問題，指「我哋屋企係咁食㗎喎」、「魚皮餃掉落去一陣就食得㗎啦！呢啲生食都食得㗎！你試下咁樣食別有一番風味呀！」

由於世伯及伯母的目光，港女不敢將魚皮餃放進鍋中再淥，便在半信半疑的情況下吃掉半粒魚皮餃，再回答「都幾好食呀」。結果港女回家後便肚痾，更需請假睇醫生，形容「連飲水都想痾」，不禁表示「如果唔係佢哋望實我嘅話，我真係唔會食未熟嘅魚皮餃」。

帖文引起網民熱議，不少人都認為當遇到不能接受的事時，應堅決表明自己的立場，「最憎就係咁，如果係我點都會出聲，放返落個煲滾多陣」、「求其作佢藉口話自己腸胃差，啲野食要煮得好熟咪得，作個故仔例如話自己細個食錯乜乜搞到入廠之類，最緊要識保護自己」、「同男友講，事實你真係食（完）痾，等佢擋否則下次又夾畀你」、「關乎身體嘅就要出聲呀」。

資料來源：「香港討論區」

關鍵字