古天后日誌｜港股反彈之路阻力重重

12月7日，早晚清涼，天氣相當乾燥，日夜溫差較大。雖然變種病毒Omicorn已蔓延至美國超過15個州，但傳染力強勁嘅同時，未見殺傷力太大，市場已逐漸消化疫情相關憂慮，美股報復式反彈。道指升646點；標指跟納指分別升53點及139點。

一如古天后所料，Omicorn變種病毒確診個案只出現溫和病況，加上美國高級衛生防護官員稱Omicron沒有出現很大程度的嚴重性，有關消息均緩和O左市場對疫情嘅憂慮。反而通脹仍然係市場關注目標，全美商業經濟協會(NABE)最新調查顯示，48位專家平均預期今季核心消費物價按年增長6%，遠高於聯儲局2%通脹目標。接近九成專家認為供應鏈瓶頸是引致通脹高企的主因。另一方面，薪金上漲亦會成為通脹未來幾年嘅催化劑。超過六成專家預期明年勞動市場可達致全面就業，而今年GDP升幅可達5.5%，明年增長則達3.9%。

至於港股呢邊亦有利好消息充喜，預期今日可收復噚日失地，重上23600水平，皆因中國人民銀行全面降準，釋放長期資金約1.2萬億元(人民幣，下同)，比7月份多「放水」2000億元。官媒事前亦發文指，唔好簡單化理解宏觀政策走向，中國將保持宏觀政策穩定性，增強政策嘅針對性及有效性，唔可能出現「大水漫灌」嘅全面寬鬆。

人行放水當然跟房地產金融風險凸顯有關，除O左顯示當局適時調節貨幣政策力度以穩經濟外，同時反映宏觀政策具調節空間，可確保經濟總體平穩，協助企業渡過年關。今次全面降準有助降低金融機構資金成本，引導貸款利率下行，減低企業利息負擔，促進實體經濟發展，尤其是緩解中小微企業經營困難，確保就業市場穩定。

預期港股可反彈靠穩，但要扭轉長期弱勢，暫時睇唔到有咁嘅條件，主要係中概股退市陰霾仍困擾相關股份，加上港股最大弱點係缺水，喺成交未能配合下，港股反彈力有限，而23800至24000將會由之前嘅支持位變成阻力位。

古天后

(徐狄怡，證監會持牌人)