安俊豪三師兄妹首度合體開騷 李妍認有蝦碌只畀自己60分

安俊豪、李妍和蘇家欣昨晚於海洋公園怡慶坊舉行「Halo Backlight慈善音樂會」，今次乃三師兄妹首次合體開騷，《造星III》冠軍折骨Ben、細貓、麥貝兒、糖兄、謝高晉等都有到場支持。李妍以《這世代》及《玫瑰有刺》打頭陣，與師兄安俊豪合唱《因為愛情》，蘇家欣分別獻唱王菲的《暗湧》與薛凱琪的《給十年後的我》等。安俊豪演繹一連串快歌《卡關達人》、《Keyman》及柳應廷的《狂人日記》，全場high爆，現場頓成大型派對，全場企起身跳舞。音樂會尾聲，三師兄妹合唱逾十分鐘的串燒歌，把音樂會的氣氛推至高峰。

完騷後，安俊豪表示很感動，笑言今次第一次夥拍師妹演出音樂會，見到觀眾睇得好投入，十分感動。安俊豪透露有意明年舉行個人音樂會：「希望可以喺九展，因為我好鍾意現場演出，可以睇到觀眾嘅表情。」但他要跟媽媽說對不起，因為最近為了排練，很久沒有跟媽媽吃飯：「返到去要錫佢十啖先得。」

作為大師兄的他，大讚兩位師妹蘇家欣及李妍的表現，他說：「今次係佢地兩個第一次音樂會跳舞，一定會有壓力。特別係李妍，由佢第一次入排舞室到今日台上，已經係進步好大，大家都為音樂會好盡力。」至於小師妹李妍，很開心可以參與其中：「我覺得同佢哋好有默契，雖然頭先有啲蝦碌，但係現場係咁㗎啦，我都盡咗力。」但她不甚滿意自己跳舞的表現：「如果多啲時間排會好啲，可能我太高，手腳會唔協調，今次畀自己60分，仲有好多進步空間。」

蘇家欣自爆開騷前一晚睡不著：「好擔心自己表現，但係喺台上感覺好實在。呢次個騷畀我好多新嘅體驗，第一次跟Simon同Leanne開show，默契比想像中好。」她期待可以在麥花臣開騷：「自己以前喺嗰度打籃球，如果可以喺嗰度開騷就好完滿。」