古天后日誌｜市場對Omicron反應過敏 適度調整反有利長線發展

11月30日，天氣乾燥，晚上顯著轉涼，氣溫將降至20度以下，講真又唔算好凍，但喺香港冬天時間愈嚟愈短之際，20度以下，又係出動冬裝嘅時間。隔晚美股反彈，市場觀望最新在南非出現的Omicron變種病毒對經濟嘅打擊，不過美股經歷上周五急挫後，隔晚三大指數反彈，道指彈236點；標指跟納指分別升60點及291點，反彈逾1%。

其實古天后噚日都講過，市場對變種病毒有O的反應過敏，雖然人Omicron傳染力或加強，但殺傷力應該更低，唔會好似原始covid病毒咁易引起重症或死亡，對經濟未必會造成太大打擊。其實病毒變種係為O左加強感染力，以尋找加多宿主寄存，正常推斷病毒唔會咁笨殺死晒O的宿主，所以變種病毒相對原始病毒，殺傷力低得多。而拜登政府已表示，暫時唔會實施封鎖嚟對應變種病毒。當然大家仍要謹慎應對，情況雖令人擔憂，但唔應該恐慌。

雖然暫時Omicron確實有幾危險仍未知，但全球政府迅速反應，希望減輕來自新變種病毒的風險，多個國家已限制來自非洲旅客入境。即使目前嘅疫苗及加強劑喺預防新變種病毒方面效果可能較差，但並非完全無效，甚至有藥廠預計明年初有機會研發出新疫苗應對。而治療嘅口服藥亦會最快喺今年底或明年初推出。加上疫情已經持續O左一段長時間，雖然國際旅行可能會繼續受到限制，但每個地方內部經濟活動，對每新一波疫情敏感度似乎逐漸遞減，呢個趨勢或延續。隨着國際加強協調，累積O左年幾經驗，而各地政府迅速應對，新變種病毒令世界經濟陷入停擺及衰退機會唔大。

反而變種病毒或減慢經濟復甦，並延長供應鏈受干擾的時間，或令寛鬆貨幣政策實施長時間，延遲收水，其實對股市嚟講並非壞事。加上今次變種病毒出現，令市場大條道理調整，有助估值回落至更合理水平，反而更有利股市長線發展。

古天后

(徐狄怡，證監會持牌人)