張敬軒凌晨開Live傾足5個鐘 Tyson Yoshi狂爆粗家謙怕羞唔願上鏡

昨晚（28日）張敬軒現身紅館出席《星光熠熠耀保良》任壓軸嘉賓，完成演出後，約凌晨12時軒仔於社交網開直播揚言要與觀眾傾心事，期間一度拉埋Tyson Yoshi及林家謙齊齊傾足幾個鐘，Tyson Yoshi更放肆爆粗，吸逾過萬人收看。

這個全新破格組合帶給觀眾不少歡樂，向來心直口快兼性格率直的Tyson Yoshi更狂爆粗，包括X街、好X煩等等，三人無所不談，話題搞笑，軒仔一度叫Tyson Yoshi不要太放肆：「你唔好咁放肆先，我哋話晒都有8千幾人喺度，可能有啲小朋友㗎。」但Tyson Yoshi仍忍唔住口，最後軒仔亦被感染跟Tyson Yoshi講粗口，更討論內地人好鍾意用某個字的粗口，直播到凌晨3時還有過萬觀眾收看。

至於林家謙就較為內斂，放不下偶像包袱，為免素顏出鏡，起初一直以黑畫面示人，最後三人如大細路一樣，大玩不同的濾鏡效果，場面搞笑。而正推出新專輯的家謙分享了自己緊張的心情，坦言並不睇好銷量，作為前輩的軒仔見狀立即安慰並給予正能量為他打氣，不少網民都紛紛留言大讚軒仔提攜後輩，直播最後到凌晨5時，仍然有逾3千人收看，對於這個「世紀組合」網民都睇得非常盡興，更有不少人多謝軒仔給予大家正能量和歡樂，表示「近幾個月負能量纏繞，睇完心情舒暢咗」、「今晚拯救咗好多人」。