古天后日誌｜美匯強勢憂慮新興市場貨幣危機

11月25日，部份時間有陽光，天氣乾燥，大家見字飲水。美債息升勢似暫緩，美股隔晚早段下跌後，尾市收復大部份失地，道指最終僅跌9點；標指跟納指則分別升10點及70點。噚晚美國公布唔少經濟數據，10月份耐用品訂單按月意外下跌0.5%，遜預期。而就業數據方面，上周首次申領失業救濟人數減少7.1萬至19.9萬人，創52年來低位，截至前周持續申領人數減少6萬至204.9萬人，兩項數據表現均勝預期。

美股仍然高企，再有大行警告，目前美股狀況尤如2000年互聯網泡沫時期，美銀表示，包括極低利率、通脹高企、以及頻繁的新股上市活動等，情況甚至比當時更差。該行認為，市場投資者已趨向「非理性」，對不合理事情接受度提高，預期明年標指將比目前水平降約2%至4600點。

除O左美股位高勢危之外，喺全球通脹持續高企，甚至趨升下，聯儲局「收水」預期令美元走勢轉強，美匯指數年初以來已累升7.78%，噚日曾高見96.94，續創去年7月以來新高。強勢美元卻令一眾新興市場貨幣成為輸家，土耳其總統一意孤行強迫央行減息，令該國貨幣里拉再創新低，年內大幅貶值逾43.45%。而有警告指，土耳其貨幣危機，或蔓延至其他新興市場國家。由於新興市場貨幣或興波瀾，投資者睇淡新興市場，認為美國及其他發達經濟體採取縮減貨幣刺激措施，將成為風險資產最大威脅。

全球經濟面臨連串負面供給側衝擊，新興市場更容易受到衝擊影響。不遆土耳其嘅情況，早已令全球投資者避之則吉，估計實際影響有限，而其他新興市場貨幣表現亦唔係太差，好似印尼、巴西等新興市場主權債孳息率仍遠高於美債，息差足以蓋過匯率虧損。況且今年流入新興市場資金有限，美匯即使再升，亦唔見得會引發大規模斬倉離場情況。

至於港股繼續弱勢，主要係幾件重磅科網股仍未見有運行，暫時港股仍然喺近月上落區間底部爭持，喺未見利好消息刺激下，港股能守住24500水平已經唔錯。雖然市場開始對內地對科網巨企監管消息逐漸麻木，好似對於騰訊(00700)監管消息反應唔大，除非喺政策上有重大改變，否則重磅科技股亦跟大市一樣，仍於區間上落，未必再向下突破。當中阿里巴巴(09988)留意130元水平能否雙底見支持，若然有貨喺手，唯有耐心等侍，現價離場似乎唔多划算。

古天后

(徐狄怡，證監會持牌人)