古天后日誌｜等阿爺放水阻止類滯漲發生

11月23日，天氣清涼，早上有一兩陣微雨，天氣乾燥。聯儲局下任人選終落實，拜登決定提名鮑爺連任，消息刺激美股早段做好，但喺美債息上下，估值較高嘅科技股受壓，美股隔晚三大指數個別發展，道指升17點；標指跌15點；納指跌勢較顯著，跌202點。

鮑爺成功爭取提名，而另一角逐者現任聯儲局理事布雷納德將被提名為副主席，並將繼續擔任理事一職。拜登表明對佢兩位充滿信心，相信佢哋能合力維持美國通脹重回較低水平、穩定貨幣、以及改善就業，重振美國經濟。拜登亦表揚鮑爺喺疫情間表現，認為佢穩定地引導聯儲局過渡前所未見嘅挑戰。提名人選將於下周待國會確認，先可以正式通過。

聯儲局主席連任，消取O左一個不明朗因素，不過市場仍然擔心喺通脹威脅下，聯儲局可能會突然加快加息速度，而目前聯儲局對應通脹速度似乎仍然慢條斯理，未見積極，更加喺通脹高位下，不斷為市場注入資金，令貨幣泡沫危機升溫。總之美股相對港股更加好炒同吸引都好，喺美股估值實際便宜下，都要打醒十二分精神。

至於港股繼續弱過藥煲，缸邊友對於港股嘅評語都係負面居多，用得最多嘅形容詞係垃圾，咁確實喺一眾重磅科技股仍然弱勢下，港股真係好難有運行。而最近唔少經濟數據反映，內地經濟「類滯脹」風險升溫內需恢復乏力，供需結構仍不平衡，區域和產業板塊復甦分化明顯。市場估計，內地未來幾個月內有需要降低存款準備金率(降準)來催谷經濟。

內地出現「類滯脹」，主因需求低迷，工業生產者出廠價格指數(PPI)漲幅又居高不下，企業利潤將受擠壓，經濟風險「釋放過快」等因素所致。內地官媒引述國務院官員指，面對新的經濟下行壓力，要強化「六穩六保」。至於如何快速解決內地經濟復甦乏力的局面，人民銀行貨幣政策委員會委員劉世錦認為，主要取決於煤電荒、汽車晶片荒能否短期內得到有效解決或緩和，房地產信貸政策的放鬆是否可以逆轉當前下滑趨勢，從而使內地經濟復甦在供需兩端得到釋放。估計臨近年尾，內地有機會放水催谷，中央或有需要放寬部分省份的樓市調控。若然阿爺真係放水，咁就可以解決目前中港兩地股市一潭死水嘅狀況，依家唯有耐心等阿爺出手，暫時港股繼續區間上落，只要唔穿24500，暫時都唔使太擔心。

古天后

(徐狄怡，證監會持牌人)