獨家丨黃浩然帶家人去食米芝蓮拉麵 着Shocking Pink背心行街好搶眼

因為14年一場大病，令黃浩然(Raymond)突然覺悟，唔好做死自己，要平衡工作，同花更多時間陪屋企人，病過方知身體健康的重要性，自始Raymond就狂做運動，特別係跑步，日跑夜跑又做Gym，而家變咗鋼條，仲感染埋老婆同兩個仔，分別係10歲Kayden及8歲Ransley，家庭樂就係做運動。採訪:梁志明

日前傍晚，着住Shocking Pink背心，潮孭心口斜孭袋的黃浩然同老婆及兩個仔現身銅鑼灣百德新街，老婆拖住細仔行快啲，一家之主同大仔殿後，其間黃太行過間時裝店就指畀老公睇，睇嚟有嘢睇啱，不過最後冇入舖，原來佢哋趕住去醫肚。

黃太買嘢諗過度過
黃氏一家去咗食過江龍，連續兩年奪得《東京米芝蓮》一星榮譽的拉麵店，食咗兩個鐘滿足離開，食店對面嘅樓上好似有Crew拍緊嘢，唔知拍戲拍劇定拍廣告，黃浩然同老婆一出食店就發現，兩人忍唔住抬頭望咗幾眼，男方就輕攬老婆條腰示意向前行唔好再望，然後黃太就行去睇瑜伽運動服，見佢睇中件橙色Top，拎起望咗一陣，一件幾百蚊，本身有家底，老公又搵到，買得起有餘，不過，黃太諗咗陣都係放低，喺店內行咗半個鐘就同老公及兩個仔離開。