古天后日誌｜阿里京東業績高下立見

11月19日，部份時間有陽光，注意下星期顯著轉涼。陽晚美股早段跌幅較為顯著，但打不死嘅美股，跌幅不僅大大收窄，道指僅跌60點；而標指跟納指更倒升收市，分別倒升15點及72點，同創收市新高。市場關注美國就業數據，美國上周首次申領失業救濟人數增加1000人，至26.8萬人，多過預期的26萬人；前周止持續申領人數減少8萬人，至208萬人；少過預期的212萬人。

大摩剛剛調低O左明年標指目標，但細摩就唱反調，繼續唱好，指隨着全球供應鏈壓力持續釋放，標指有望進一步上漲，預計到2022年上半年，將從目前水平上漲逾6%，至5000點。該行預期，供應鏈壓力及勞工短缺問題開始改善，企業收入將隨之上升，帶動指數。

至於港股隔晚ADR及夜期均見下跌，主要係阿里(09988)派完成績表後捱沽，喺ADR急跌一成，至140元水平。阿里派完成績表插水，當然係交出一份差過預期嘅業績，其收入增長更係有紀錄以嚟最差一次表現，再加上雙十一購物節增長僅錄得單位數字增長，股價難逃一跌。相對同業京東(09618)無論業績表現跟雙十一購物節增長都好遆阿里，無比較就無傷害，兩者高下立見，難怪資金捨阿里，取京東，以致近日兩股走勢南轅北轍。加上今日恒指服務公司將於今日收市後公布季度檢度結果，而京東係染藍嘅熱門之選，更加令京東表現遠遠跑贏阿里。短線阿里難免捱沽，但長線投資嚟講，阿里股價跌至140元水平如能企穩，其實亦可以小注博反彈。

至於大市整體仍處於上落市格局，移動區間暫時喺24800至25800水平，26000點暫時仍遙不可及，要重返250日線( 27415)更加遙遙無期，100日線( 25925)成為短線阻力。喺阿里拖累下，今日恒指再度失守多條移動平均線，短線支持位大約喺24800點，如果今日守得住，要重返10日線( 25215)、20日線( 25313)及50日線( 25170)匯聚區，又唔係太大難度。不過喺港股持續缺水，塘水滾塘魚嘅情況下，企得返上二萬五又如何，要進一步向上突破挑戰100日線，除非有較利好消息刺激，否則都係悶局一場，一副趕客姿態，難怪愈來愈多股民，尤其係年青一輩均轉投美股，甚至虛幣市場，早已對港股意興闌珊，甚至抱放棄態度。

古天后

(徐狄怡，證監會持牌人)