《戀講嘢》嘉賓慘被歌手前男友狠飛 《造星II》Eagle嫌疑最大

ViuTV節目《晚吹- 戀講嘢》昨晚（16日）嘉賓Wai Wai於節目上大爆，男友在入行簽約唱片公司後，就慢慢疏遠她，感情無疾而終，引起網民熱烈討論其男友的身份。其實節目中Wai Wai已經提出了不少線索，指男友是創作型歌手，亦都擅長畫畫，她更稱男友屬實力派歌手，因此被主持郭嘉駿（193）笑稱對方不是靚仔，而193亦爆響口表示認識Wai Wai的男友。而Wai更加碼爆料指，男方的新歌有寫明是寫給前女友，將關係形容為曲終人散。

Wai Wai透露跟EX在國外實習時認識，指因為去唱K，聽到男方唱歌好好聽而被對方吸引，回到香港後再約會，之後就拍拖。她透露男友是個頗有心思的人：「2月14日情人節，佢作咗首歌送畀我，寫嘅內容係關於我。因為佢當時寫埋我個名入去。佢畫畫好叻，嗰陣我話我鍾意收親手造嘅禮物，所以佢喺特別日子都會整份禮物畀我。」

不過關係在男友與唱片公司簽約後出現轉變，Wai Wai表示：「我哋係無疾而終，我哋好少鬧交，有次連續幾日有啲爭拗。嗰日我生日，佢送咗幅畫畀我，但後來佢講咗句『我因為畫呢幅畫畀你，搞到我冇時間，做少咗音樂』，但冇要求佢送畀我。」之後二人就開始冷戰。「一個月後佢就打咗好大段嘢畀我，大概係話佢呢刻想專注做音樂，因為佢嚟緊要派台，好多嘢做，佢話忙完所有嘢會再搵我。咁因為我哋有啲爭拗，佢話唔想有一丁點嘅情緒，影響到佢做音樂。」Wai Wai道。於是她直接問男友是否想分手，但男友表示不想分手。而Wai Wai就想男友給她一個時間，到底要讓她等多久，但男友未有確實回答。

男方之前曾將寫給Wai Wai的歌拍了MV，Wai Wai看到一位女生做MV女主角，而Wai Wai之前就曾向男友提起不太喜歡這個女生，Wai Wai一怒之下在社交網取消追蹤男友。但Wai Wai強調知道男友和那名MV女主角沒有私交，純粹是工作上合作。193稱男方應該是不想親口說分手，而想一直拖到關係無疾而終。又或者男方入行後，見識到世界另一面，認識到更多人，才發覺女友Wai Wai微不足道。

雖然二人已分手，但Wai Wai仍希望男方繼續追尋自己的夢想，令193都聽到眼濕濕。有網民整合了關於Wai Wai男友的線索：創作男歌手、有簽約唱片公司、識畫畫、寫歌給前女友、MV有女主角等。有網民推測可能是去年唱作新人陳浩，不過線索不是全中，而陳浩亦在IG作出否認。其他嫌疑人包括：林家謙、應智越（細貓）、陳天翺（Eagle Chan）。但當中林家謙及細貓都是獨立歌手，《造星II》出身的Eagle似乎最有嫌疑。

Eagle是今年樂壇新人，行唱作路線，雖然之前以獨立身份發展，但日前宣布加盟「Kingdom C」，成為C AllStar同門師弟，而他本月27日舉行的音樂會，亦是由該公司宣傳。不過從其歌曲就未有找到Wai Wai的名字，而網民就發現Eagle的《OUR LAST DAY》MV片尾，女主角慢慢不見，有「曲終人散」的意思。